真係撞鬼喇，都回歸咗近廿年啦，末代港督「肥彭」彭定康又回魂，佢挾住前港督個名，出席前政務司司長陳方安生搞嘅「香港管治︰禮崩樂壞」論壇，個壇未開已經有晒定論咁，話要講吓點解香港回歸咁耐，管治質素一日衰過一日喎！
肥彭成隻冤鬼咁，來回西方極樂世界，好似冤魂不散咁纏住香港唔放，嚟到香港猶如入咗無人之境，鍾意就回魂現身重現人間，發完噏風就閃人。肥彭唔通以為自己啲口水係聖水，出嚟噴吓口水亂噏廿四，就可以灑走晒香港嘅怨氣呀？老老實實，香港依家仲係英國管咩？肥彭都走咗廿年啦，香港係好定唔好，都唔關佢事啦。
不過你咪理，肥彭就係不甘寂寞，就係鍾意指點江山，佢尋日喺外國記者協會演講，正義朋友上身咁款，話將港獨同爭取民主混為一談係不智及不誠實，港獨根本無可能發生，盞影響港人對民主嘅支持；又話立法會宣誓係嚴肅嘅事情，唔應該同言論自由混淆。都係嗰句，不在其位，不謀其政，香港內部嘅事，幾時輪到佢出聲。最好笑嘅係，肥彭連特朗普都評埋一份，話希望佢上台後證明自己唔係好似競選時咁喎。好心佢搵盆水照吓鏡啦，以為自己係英國首相呀？講真，佢呢亭過氣舊電池，同「英國維園阿伯」冇乜分別嘅咋！
其實佢應該心知肚明，依家係誰家天下。好似業主明明已經收番間屋，照計同舊租客無瓜無葛，點知呢位過氣肥租客仲好似吊靴鬼咁冤魂不散，唔單止成日好似「癡漢」咁喺門口眼甘甘（目及）到實，仲要入埋廚房出埋廳堂上埋你張大床，一時讚個浴缸好大好正好好浸，一時彈張床又硬又細唔好瞓，總之陰魂不散，失驚無神閃出嚟搞三搞四，你都咪話唔驚。最恐怖係，呢位前租客仲夾埋上手看更阿嬸「民主阿婆」一齊搞住晒，真係掘頭掃把趕佢都嫌太慢啦。諗極都唔明，香港政府就話奈佢唔何啫，唔通連中央政府都冇佢符，餐餐畀佢嚟香港攪局，指手畫腳？
喺一九九七年六月三十日，肥彭喺港督府，即係依家嘅禮賓府花園，滂沱大雨中收旗走人，佢一家人夜晚坐船喺漆黑嘅海上消失，佢三個女兒依依不捨梨花帶雨，從嗰一刻起，香港同佢已經無晒關係，點知佢多次回魂，喺關鍵時刻喺香港煽風點火，指手畫腳，仲有前看更阿嬸陳方安生做帶路黨，呢啲咁嘅過氣前政客，真係無品之極呀。
大家睇得一清二楚喇，面對肥彭呢隻死唔斷氣嘅冤鬼，中央無奈，港府冇符，港產官僚仲好似小學雞咁軟軟弱弱，餐餐畀佢嚟指指點點，唔通真係要請張天師出山降魔伏妖？