「高薪養廉」就話聽得多啫，「高薪養草」大家又聽過未？呢嗱，十大基建之一嘅西九文化區就係最佳例子嘞！
西九文化區起咗N咁多年，到依家仲係沙塵滾滾，爛地一笪，早年獲立法會批出嘅二百一十六億元工程費用，已經用得七七八八，所謂「亞洲文化樞紐」至今連影都未有，但納稅人未見官就要被打三十大板，事關西九文化區管治架構龐大，人員臃腫，淨係行政總裁年薪已經超過五百萬元，連同七位高層，年薪盛惠一千九百多萬元，而且唔理工程點拖都好，呢班高層無所事事又好，高薪厚祿一樣袋袋平安，乜嘢叫世界最筍工，大家見到喇。
話呢班打工皇帝胡混度日，物非所值，絕對唔係冤枉o架。呢，唔知係咪無所事事得滯，西九視覺文化博物館M+最近興建小型展亭，本來諗住可以吸引多啲遊客，點知因為交通不便，欠缺宣傳，加上周圍地盤噪音擾人，搞到門可羅雀，啱啱過去周末下午記者實地觀察，結果發現得五個客仔咁大把，工作人員仲多過訪客，簡直吹脹。呢啲咪正牌「高薪養草」囉！
講起西九文化區呢筆糊塗帳，真係數到天光都數唔完。港府迷信洋和尚會唸經，前後重金禮聘三位洋總裁，結果次次都搞出個大頭佛。第一位來自英國嘅謝卓飛，上任唔夠半年貨仔就以健康理由請辭，一個屈尾十返老家出任新職，將港府玩到氹氹轉；接任嘅連納智同依家嗰位栢志高，一樣係行行企企，食飯幾味，特別係栢志高，除咗係退休高官兼夾曾爵士愛將之外，全無藝術推廣經驗，基本上九唔搭八。港府不問賢愚，唯洋是用，唔通七百萬香港人，就冇一個人才堪用嘅咩？
事實證明，外國月亮並唔係特別圓，老外同中國人一樣，都有唔少盲毛同庸才。西九管理局之前試過豪擲一億多元，從瑞士大手購入一批藝術品，結果被炮轟物非所值入錯貨，畀人笑到面都黃。旨意呢班友推廣藝術，蚊都瞓蛇都死。
好嘞，就算當港府冇請錯人，班洋人一個二個都係文化藝術大師，咁又如何？開講有話，冇咁大個頭唔好戴咁大頂帽，香港有名你叫「文化沙漠」，官僚冇藝術細胞，市民欣賞水平亦未必跟得上，起咗文化區又點，唔通淨係服務洋人咩？
有人就講得啱嘞，西九係難得嘅市區靚地，與其丟空養蚊，不如地盡其用，辦市集又好，起公園又好，周圍起跑步徑同碼頭都好，起碼畀一家大細有多個休憩地方，畀遊客多一個消閒所在。始終都係嗰句，香港地寸金尺土，港府暴殄天物，先至係最大罪過吖！