唔知係咪衰開有條路，民航處新空管系統啟用以來，甩轆嘢多到數都數唔晒，簡直係鑊鑊新鮮鑊鑊甘，再係咁落去，遲早爆大鑊嘅咋！
呢嗱，話口未完又嚟喇。一班國泰航機日前同另一航空公司嘅客機，喺空中飛行距離一度只有四點一海里，遠低於國際民航組織最低要求嘅五海里。更得人驚嘅係，監察人員唔熟新空管系統，睇漏咗眼，直至空管系統發出警示至知大鑊，緊急通知兩機拉遠間距。唔好以為五海里係好長嘅距離，其實對航機來講係間不容髮，低於呢個間距好易出事㗎。據講上個月亦曾發生類似事故，當時涉事嘅兩架國泰航機仲爭啲迎頭相撞添，真係諗起都牙煙。
民航處例牌又係大事化小，小事化了，唔係死撐空管人員對相關航機發出指示，航空安全並冇受到威脅，就係話世界各地無論使用乜嘢空管系統，間中都會出現航機間距不足嘅情況。民航官僚唔認錯都算嘞，仲夠膽死反咬市民「捕風捉影」。大家關心航空安全好正常啫，民航官僚竟然老羞成怒，仲有冇再離譜啲吖。
聽吓立法會議員點講喇，出現航機間距不足情況，唔排除因為新空管系統顯示屏經常出現「鬼機」，影響空管人員判斷，絕對唔係民航官僚講到咁輕描淡寫。仲有吖，有民航處前線空管人員爆料，話最近收到處方內部通告，提醒有關人員唔好向他人透露內部問題及資料，否則可被處分。咁即係點？即係民航處心中有鬼，所以急急臭屎密冚咯。
話時話，當初民航處購買新系統耗資十五億元，已經被狠批「又貴又廢」，全球只有三個地方使用，連印度機場都彈到九彩。最弊係新系統問題多多，拖咗多年先至上陣，結果又係危機四伏，乘客唔驚就假，你話民航官僚係咪靠害吖。
當然喇，新系統唔買都買咗，家陣木已成舟，除咗繼續追究採購過程中有冇官員失職甚至涉及利益衝突，最緊要就係堵塞漏洞，防止意外發生。話時話，新空管系統千瘡百孔，上述問題只不過係冰山一角。試諗吓，新系統幾乎三日一小鑊，五日一大鑊，除咗系統本身有隱患，前線人員對新系統夠唔夠熟手，亦係一個大問題，連民航官僚都承認，新空管優化仲要等多一年半載，實際情況有幾嚴重，真係冇人話得埋。
始終都係嗰句，航空安全人命關天，點樣小心都不為過。咪話功夫茶唔提醒，為過渡至新空管系統而削減航班嘅措施啱啱結束，空中交通回復正常，任何麻痹大意，後果可大可小，分分鐘引發奇災巨禍㗎！