中央向反對派立法會議員發還回鄉證，可惜有人唔領情，話怕返到內地有危險喎。計功夫茶話齋，內地危機四伏，即使撇開政治嗰筆唔講，淨係啲食品咁多毒，啲空氣咁污濁，分分鐘命都短幾年，啲政客唔驚就假咯！
唔係危言聳聽㗎，聽下喺北京做嘢嘅港人點講。有人話盡量避免外出，並且喺室內安裝空氣淨化機；有人話喺霧霾天氣下眼睛痕癢，出現嚴重皮膚敏感症狀，甚至哮喘復發；有人完約後急急腳返香港，發誓唔再留京工作；至於經常帶北京團嘅領隊，為咗搵食惟有頂硬上，結果一個二個唔係咳就係呼吸道感染，直頭係搵命博。
北京流傳一句順口溜︰「遛狗不見狗，狗繩提在手，見繩不見手，狗叫我才走」，可見當地霧霾有幾咁嚴重，堂堂「首善之地」淪為「首污之地」，都咪話唔悲哀。最近外國研究發現，北京霧霾中含有抗生素抗藥性基因，一旦吸入後果可大可小。早前亦有研究顯示，中國北方人均壽命比南方人低五點五年，唔怪得呢排霧霾又起，有女星即時帶囡囡搭飛機逃離北京喇。講真，類似嘅「候鳥」現象已經成為一道風景線，每到冬天，北方燒煤供暖造成污染，令霧霾問題惡化，好多人都飛去海南等地避霾兼夾避寒。至於更有條件嘅人咯喎，唔使問阿貴，梗係直接移民美加澳紐，享受陽光與海灘喇。
講開又講，由於霧霾實在太惡頂，竟然催生出商機，有人諗到將清新空氣製成罐裝出售，據講來自新西蘭嘅純淨空氣，每罐索價近二百大元，即係吸一啖要一蚊。「點石成金」就聽得多啫，家陣空氣都可以變錢，真係唔到你唔服。有人更加苦中作樂，話官老爺雖然可以有特供水同特供食品，但霧霾面前人人平等，大家「同呼吸，共命運」，老百姓條氣都順啲喎。
冇錯，近年內地當局喺治霾方面的確下咗唔少工夫，咩限車令呀、禁止排放唔達標嘅車輛上路呀、重污染行業錯峰生產呀……名目繁多，不一而足。國家每次舉辦盛事，甚至可以傾全力打造「APEC藍」、「G20藍」，弊在呢啲都係治標不治本，事關以往發展經濟不惜犧牲環境，欠落老天爺太多債，有乜法子唔積重難返吖。
大家有眼見，生命三大要素嘅陽光、空氣同水，霧霾搞到暗無天日，空氣有毒唔在講，水污染問題亦係愈來愈嚴重，嚴重威脅國人嘅生命健康，有錢都驚冇命享。領導人成日講「中國夢」，大家舉雙手贊成，但如果冇乾淨嘅食水，蔚藍嘅天空，清新嘅空氣，講乜都嘥氣喇！