九霄驚魂嚇餐飽 國泰甩轆何時了

古人教落,「行船跑馬三分險」,出門旅遊買保險係常識,之不過如果閣下搭正國泰咯喎,保費分分鐘可能貴人一截,咁又係嘅,佢哋三日唔埋兩日上演九霄驚魂,保費重皮啲買個安心都好吖嘛。

呢,話口未完又嚟喇。本報接獲讀者報料,話佢友人上星期喺台北乘搭國泰航班回港,點知起飛約廿分鐘發現機門未閂好,要緊急折返台北,用咗超過三粒鐘至返到香港,比正常時間足足多咗成倍。耽誤時間事小,機上全體三百幾名乘客嚇到鼻哥窿冇肉嗰度至大鑊。

咁國泰方面又點解畫呢?佢哋話喎,當時信號顯示,機艙內其中一個機門可能未完全關閉,基於乘客及機組人員安全,機師按照既定預防性程序折返,之後證實純屬信號問題,並確定機門已經關上,涉事客機經檢查後已重投服務。而專家亦都話,相關信號故障十分罕見,加上客機喺高空飛行時,機艙內有加壓,而機艙外嘅氣壓又比機艙內低,因此機艙內嘅氣壓會壓實機門,乘客毋須太擔心喎。

咁講喇,專家之言,信不信由你,事關呢個世界乜嘢意外都可以發生,由英國脫歐到狂人特朗普入主白宮,簡直係世事如棋局局新,有人形容專家嘅眼鏡唔係用嚟戴,而係用嚟跌,一啲都冇誇張。再講吖,航空安全講究絕對精密,半分差池都足以致命,唔知大家點睇,功夫茶就硬係覺得,淨係靠氣壓頂住道門,好似唔係咁穩陣咯。

仲有唔好唔記得,國泰一向有鋪隱瞞癮,之前客機食水驗出大腸桿菌含量超標,該公司開頭就一直臭屎密冚,今次所謂系統誤報到底有幾成真,只有佢哋至知。退一萬步,即使好似國泰咁講,今次只係系統誤報引發虛驚一場,既然系統可以「警鐘誤鳴」,難保下次唔會機門打開當閂埋,咁搞法乘客條命容乜易凍過水o架!

大家有眼見,國泰嘅甩轆嘢鑊鑊新鮮鑊鑊甘,機師違規帶刀上機搞到航班被迫取消,電槍怪漢闖禁區,行李炸彈驚魂,以至押運現鈔失竊等……簡直無奇不有。服務差都算嘞,國泰仲要店大欺客,機票超賣當食生菜,旅客因為咁樣延誤行程,由商務艙「降呢」至經濟艙;由經濟艙被迫搭下一班,可謂不計其數;最離譜嘅係,為咗賺到盡,國泰諗縮數無所不用其極,除咗縮窄座位尺寸增加載客量,仲夠膽死諗過縮減長途航線執勤機長,同搵乘客條命較飛冇乜分別。

唔怪得國泰愈做愈縮,最近仲連累埋母公司發盈警。難為佢哋仲好意思自詡香港人嘅航空公司,家陣居然淪落成咁,何止連累母公司,直頭丟晒香港人架喇!