汪阿姐嗰首《勇敢的中國人》唱到街知巷聞，點知家陣竟然連食蟹都要勇字掛帥。唔係講笑，有「象哥」之稱嘅立法會議員黃定光近日搞咗個大閘蟹宴，仲話出席嘅傳媒好友全部係勇敢嘅香港人，證明家陣擦大閘蟹隨時要搵命博(o架)。
呢，話口未完又嚟嘞。食安中心今個月初喺市面抽查十二隻大閘蟹樣本，雖然第一批首六個樣本全部過關，但尋日公布第二批另外六個樣本嘅檢測結果，其中一個報稱來自湖北仙桃市嘅樣本就發現二噁英含量超標，即係平均消費十二隻蟹，就有一隻毒蟹食落肚。最弔詭嘅係，今次出事嘅樣本二噁英組合圖譜，與來自同一產地嘅其他樣本極不相符，反而同第一次驗出二噁英超標、來自太湖水產養殖場嘅圖譜極為相似。咁即係點？即係樣本與產地不符囉，即係唔排除有人偽造產地文件囉。
食安專員係咁講嘅，今次發現問題樣本嗰間店舖，正正係首次爆出大閘蟹二噁英超標嘅太湖大閘蟹進口商之一，該店老闆當時表示所有涉事太湖大閘蟹已悉數出售，所以無法回收，又因為港府及江蘇當局已即時停止出入口，按道理市面唔應該再搵到涉事太湖蟹，但事實啱啱相反。咁到底係咪有人講大話，甚至做手腳玩掉包，仲要查過至知，但毒蟹一次又一次襲港，市民聞蟹色變，真係唔到你唔驚(o架)。
你話唔係咩，今次事件證明市面仍然有毒蟹出售，亦即係食環署把關繼續烏瀡瀡。冇錯，食安中心嘅抽查係就係快手咗，但都係賊過興兵，市民早就食咗毒蟹落肚，點都補唔番。再講吖，內地大閘蟹問題多多早就唔係新聞，一時被踢爆係激素蟹，一時又被揭發係冒牌貨，食環署咁都仲唔打醒十二分精神，擺明靠害啫。
當然，問題根源始終係內地監管不力。呢，之前太湖大閘蟹出事，傳媒調查發現可能同附近嘅巨型垃圾山有關，事關垃圾山漏出垃圾汁，嚴重污染太湖水質，啲水產唔毒至奇。你話嘞，垃圾山竟然可以長期堆喺湖邊，如果唔係當地官老爺隻眼開隻眼閉，甚至官商勾結，點可能發生呢啲咁嘅事吖？
講起就唏噓，內地一味將「發展就係硬道理」視為金科玉律，對環境嘅傷害視若無睹，加上環保政策落後，終於將錦繡河山變成殘山剩水，加上無良奸商為求賺錢無所不用其極，搞到黑心食品氾濫成災，連香港都身受其害。點都好啦，唔該香港及內地食安官僚知恥近乎勇，的起心肝杜絕黑心食品，否則中國人又再淪為東亞病夫，有錢都冇命享，仲講咩中國夢喎。