一場黃雨搞到香港呢個「福地」雞毛鴨血！市民埋怨天文台點解唔掛紅雨？事關黃雨及雷暴警告期間，正值早上繁忙時間，大批市民趕上班，大批學生趕上學；在滂沱大雨下，嗰種狼狽，唔知嘅，睇到水浸保母車死火，馬路去水去唔切頓成澤國，有消防員甚至要揹着學生涉水返學，嘩！唔通黃河之水天上來？乜香港都有海嘯咩？學生被困水潭，老朽相信吳得掂局長仍春夢正濃！否則，佢都應該宣布幼稚園及幼兒中心、肢體傷殘兒童學校停課一天啦！之但係，呢個愛讀書嘅教育局局長，畀多數家長及老師嘅印象就係十二月種芋頭——外行。
老朽但知吳得掂如山裏的蟈蟈，即係光叫喚不幹活！其實，如果佢稍為留意晨早暴雨情況，即使唔宣布小學停課，起碼幼稚園都要停課！講真，幾歲人仔最重要嘅就係安全第一，學少一日，相信唔會阻礙佢哋將來上進嘅階梯。老朽建議凡我家長，遇到特別惡劣嘅天氣，切勿一本通書信到老，亦不必理會天文台嘅乜鬼「科學數據」，明明已經水浸眼眉，尤其係新界西北，元朗、屯門和大埔雨量都逾五十毫米啦，北區、沙田嘅雨量亦逾四十毫米，喺咁嘅情況下仲要小朋友返學，除了狼狽更加危險。機制係死嘅，人係生嘅，自己孩子自己救，各位家長，請用自己的方式令孩子快樂成長吧！
各位家長，每個孩子的童年只有一次，我們做家長的，平時已經沒有多少時間陪伴小朋友親親大自然，池塘聽蛙、落水澗抓小魚、沙灘堆沙……家陣還要他們受雷暴狂雨的打擊上學去，在混亂濕透中如何愉快地學習？上班族底褲濕透為搵食冇計，自家孩子又何必為上少一日課耿耿於懷，睇吓啲高官hea吓hea吓還不是又一日！向吳得掂學習，在家睇多兩本《老夫子》好過。