俗語話，有咁耐風流就有咁耐折墮。身為機管局企業發展執行總監嘅換樓醜聞男主角馮永業，先後被揭發任職政府期間涉嫌濫權，以及瞞妻與女富商交往，除咗可能要面對廉政公署嘅調查，而且隨時變成「雙失」中年：婚姻亮起紅燈不特止，連份工都可能保唔住。
係咁嘅，喺換樓醜聞曝光之前，馮永業已積極搵工跳槽，首選係公營機構或與航空業有關嘅公司高層，點知依家醜聞通晒天，睇怕都幾難有公司聘請佢，加上機管局正密謀踢走佢，兩頭唔到岸，想唔「雙失」都唔得喇。
所以話，人算不如天算。作為前特首曾蔭權爵士嘅愛將，馮永業一直順風順水，離開政府後首先擔任生產力促進局總裁，年薪三百萬元，即使表現一般，而且同員工關係惡劣，仍獲邀加入機管局，任職年薪四百五十萬至五百五十萬元嘅企業發展執行總監。當年有傳聞指佢熟悉機管局運作後，將會更上一層樓，出任年薪高達八百萬至一千萬元嘅行政總裁，可惜吖，後來機管局主席由「梁粉」羅康瑞擔任，馮永業升職無望，本來想搵工跳槽，結果又被揭發換樓以及同賭王三太胞妹陳婉玉秘密「交往」等醜聞，搞到臭名遠揚，係人都避而遠之。
正如有人話齋，馮永業喺機管局主要負責推銷興建第三條跑道，本來已經極具爭議性，加上馮永業醜聞纏身，更難說服市民尤其環保組織接受，機管局再唔盡快清除呢個政治負資產，遲早被佢佗衰家。
當然喇，就算馮永業真係「雙失」，亦唔使憂柴憂米，佢同擔任民政事務局常任秘書長嘅妻子馮程淑儀生財有道，過去利用公務員按揭福利為跳板炒賣物業，炒一間賺一筆，估計累積盈利最少超過五千萬元，打跛腳都唔使憂。相反，馮氏兩公婆可能求仁得仁添，日後索性專心揸鑊剷做職業炒家，話唔定仲好過做官。
講到呢度，大家應該知道點解港府施政混亂，烏龍百出。高官一個二個掛住以權謀私，唔係涉嫌樓換樓官商勾結，就係炒樓搵真銀，反而公事冇人關心，施政又點可能唔混亂吖。最離譜嘅係，馮永業唔止涉及換樓醜聞，仲被揭發擔任港府高官期間涉嫌濫用職權暗助陳婉玉發展直升機業務，唔怪得陳婉玉被指變得「非常有野心」喇。
最好笑嘅係，自從醜聞曝光後，馮程淑儀就開始玩失蹤，連結婚戒指都消失埋，搞到港府要搵人署任佢嘅職位。其實，出嚟行遲早要還，逃避唔係辦法，呢單換樓醜聞馮氏夫婦仲欠公眾一個交代，與其玩失蹤，不如及早面對，如果唔係，盞愈遮愈醜、愈揭愈臭嘅咋！