好多人經常會問，邊有咁大隻蛤乸隨街跳？其實，現實中真係有（口架），仲要畀民政事務局常任秘書長馮程淑儀撞到正執到寶添，唔到你唔服。
係咁嘅，馮程淑儀兩年幾前擔任康文署署長期間，以西半山雍景臺一個實用面積一千一百幾平方呎嘅單位，換取賭王何鴻燊三太陳婉珍嘅胞妹陳婉玉名下跑馬地兩個同層相連單位，實用面積合共逾二千三百平方呎。根據測量師估計，兩者差價係九百五十萬元，點知呢位女高官淨係向對方補價六百五十萬元，足足比市價低三百萬元，你話係咪咁大隻蛤乸隨街跳吖？
係人都知，本港樓價高不可攀，尤其係跑馬地黃金地段兩個相連豪宅單位更可遇不可求，馮程淑儀居然以筍價執到寶，簡直離奇，正如歌仔所唱「心裏有個謎，難解難計」，究竟係呢兩個單位有問題，定係換樓交易有問題？
聽吓呢位女高官點解釋喇。佢話喎，有關交易係由物業代理處理，整個過程唔知交易一方嘅身份，亦從來冇接觸對方，事後已向政府申報，而且按照稅務局規定支付有關差價嘅雙倍印花稅喎。總之推到一乾二淨，若無其事咁。
可惜吖，無論點樣狡辯都好，始終掩蓋唔到事實。原來馮程淑儀嘅丈夫馮永業係機管局企業發展執行總監，以前曾擔任港府經濟發展及勞工局副秘書長，主理航權、直升機機場擴建等事務；而陳婉玉喺同一時期出任直升機公司嘅股東及行政總裁，期間公司唔止奪得上環港澳直升機場專營權，仲受惠於中港開放航權，成功申請成為第二家經營廣州線嘅指定航空公司添。咁你話嘞，呢單換樓交易有冇蠱惑吖？有冇官商勾結吖？
市民眼睛係雪亮嘅，馮程淑儀繼續死撐，盞愈描愈黑咋。其實，呢位女高官已經唔係第一次爆醜聞，佢曾經喺跑馬地豪宅嘅天台僭建空中花園，被踢爆後至死死氣拆除。高官知法犯法，唔怪得僭建物遍地開花喇。嗱，當年馮程淑儀有前特首曾蔭權爵士照住，今次仲有冇保護傘呢？
所以話，物以類聚，人以群分，煲呔曾因捲入連串貪腐醜聞而被廉署起訴，佢嘅愛將馮程淑儀亦涉及官商勾結，簡直係一擔擔。冇法子喇，經過前朝七年之亂，港府禮崩樂壞，法治及廉政蕩然無存，官商勾結又有乜出奇吖。香港貪腐風氣話就話冇內地咁離譜，但高官收受延後利益早就屢見不鮮，今次揭發嘅換樓交易可能只係冰山一角咋。
一句講晒，若要人不知，除非己莫為。呢單醜聞大把手尾跟，當局千祈唔好又官官相衞吖。反正馮程淑儀係前政務司司長許仕仁嘅舊鄰居，兩人有緣又啱Key，不如約埋舊老闆曾爵士齊齊相聚！