講就天下無敵，做就有心無力。港府成日將保育歷史建築掛喺口邊，其實只係葉公好龍，歷史建築拆吓一間又一間，而剩低嘅亦多數因為日久失修，溶溶爛爛，睇見都眼冤。
話口未完，又有歷史建築就快消失嘞。位於山頂盧吉道廿七號嘅大宅早前計劃改建成酒店，結果因為區內人士反對而暫時得以保存。而隔籬廿八號大宅就冇咁好彩嘞，雖然一三年已被列為三級歷史建築，但仍然難逃被拆卸厄運，近日有工人搭建棚架展開拆卸工程，連大宅內多棵近百年樹齡嘅老樹亦被「肢解」，聽講業主計劃改建別墅作出售或出租用途喎。
話時話，呢幢超過九十年歷史嘅大宅，除咗圓拱形窗戶、懸空觀景平台以及正門平頂遮蓋等建築風格極具特色，連同毗鄰嘅二十七號大宅、三十四號舊山頂餐廳、三十五號爐峰峽電力分站等，形成殖民地時期建築群，可以講係彌足珍貴，缺一不可，家陣搞到殘缺不全，簡直大煞風景。
講嚟講去，舊建築之所以逐漸消失，皆因港府保育政策不合時宜。歷史建築評級制度只屬行政性質，並無法律約束力，只要業權人依足法例向有關部門申請，隨時可以改建、發展或更改用途。正如有地區人士話齋，古蹟辦話就話有同業主溝通，但到底係有具體方案定係求其打個電話當交差，根本冇人知。大家有眼見，私人歷史建築話拆就拆，盧吉道廿八號大宅係咁，之前山頂何東花園同灣仔同德大押又係咁，證明港府嘅所謂保育純屬吹水。
即係咁，香港係自由市場，私人財產受法律保護，業主在商言商，就算拆卸歷史建築亦冇人可以阻止，最荒謬嘅係，即使業主有心保育，亦往往因為當局支援不足而無能為力。今年施政報告話就話預留五億元作保育歷史建築嘅基金，係威係勢，點知原來係政府出豉油市民出雞，每幢建築物維修費上限得一百萬元咁大把，聘請顧問進行技術評估及維修方案等，全部貴客自理，結果唔湯唔水，你話係咪嘥氣吖。
正所謂，唔怕唔識貨，最怕貨比貨。新加坡面積比香港細，但人哋保育有規劃同配套，搞到有聲有色，好似牛車水咁吖，保留咗好多有特色嘅傳統店屋，吸引各地旅客慕名而至。而一水之隔嘅澳門地方更細，一樣保留咗唔少歷史建築，反而香港舊建築買少見少，簡直相形見絀。
講多無謂，食多會滯，行動最實際。保育唔係趕時髦，更加唔係靠把口講，港府再唔全面檢討保育政策，歷史建築遲早全部淪為集體回憶嘅咋！