多勞多得，少勞少得，呢個係商業社會嘅原則。不過咁，世事總有例外，好似立法會議員咁吖，就算不務正業，有破壞冇建設，亦唔使減人工，反而大加津貼添，問你服未。
係咁嘅，行政會議日前通過獨立委員會建議，來屆立法會議員嘅九萬三千多元月薪及每年三萬二千多元醫療津貼維持不變，而辦事處營運開支津貼就增加百分之七至每年逾二百五十五萬元，開設辦事處和資訊科技開支津貼更大增五成至每屆任期逾三十七萬元添。
議員冇人工加，好似冇乜着數，其實呢份工都唔知幾好做。立法會近年烏煙瘴氣，反對派拉布流會，阻撓施政，固然不知所謂，建制派冇做好自己份工，經常喺重要關頭甩轆，同樣令人失望。難怪有人話，以議員咁嘅表現，凍薪已經便宜咗佢哋，應該減人工至係。
話時話，開設辦事處和資訊科技開支等津貼獲得大幅增加，其實即係變相加薪。特別係立法會嘅津貼制度經常遭到濫用，議員申領冇規冇矩，等如左袋落右袋。本報過去多次揭發議員大花筒，唔潮唔買，唔貴唔買，有議員仲一次過買幾部同一款式手提電腦，簡直當納稅人係提款機。咪話以「君子之心度小人之腹」，今次立法會獲增加津貼，議員只會更加洗腳唔抹腳。
所以話，立法會議員可能係全世界最筍嘅工作，返工唔係搵周公，就係睇AV，再唔係就掟蕉、掃枱、爆粗，被驅趕離場仲可以提早收工添。今時今日經濟不景，世界難撈，打工仔嘅人工好似成年人嘅身高咁，定咗就好難再增高，唯獨議員例外，人工有增無減，旱澇保收，唔怪得咁多人爭崩頭，有人甚至連書都唔讀，要求降低參選年齡喇。
政客尸位素餐都算嘞，仲要政治掛帥，為反對而反對，為拉布而拉布，搞到議會癱瘓，施政受阻，社會受害。呢，家陣距離今屆會期完結只有三個多月，但仲有二十多項法案未審議，財委會亦有十八個撥款項目未通過，咁搞法，香港想有運行都幾難喇。港府最近主動提出民生項目優先，無疑用心良苦，不過如果政客存心刁難，隨時又係對牛彈琴嘅咋。
最荒謬嘅係，立法會烏煙瘴氣，議員不務正業，當年居然仲夠膽建議自我加薪一倍，簡直唔知個醜字點寫。好彩呢項建議最後被否決，否則納稅人就冤枉喇。正如有人話齋，港鐵票價都有可加可減機制，議員薪酬亦應該效法至係。不如咁吖，從下屆立法會起設立浮薪制度，薪酬同表現掛鈎，邊個不孚眾望就被減薪，咁立法會或者可以少啲垃圾政客，你話係咪！