世風日下，豺狼當道。香港近年烏煙瘴氣，牛鬼蛇神特別多，無良政客固然搞風搞雨，唯恐天下不亂，連黑幫亦肆無忌憚，公然挑戰法治，打壓新聞自由，簡直係和尚打傘，無法無天。
係咁嘅，黑幫和勝和前坐館「上海仔」郭永鴻作惡多端，被傳媒踢爆涉嫌僱用無業青年貼街招恐嚇勒索本港多名富豪。東方報業集團發揮第四權監察力，仗義執言揭發其種種惡行，點知遭到惡意報復，連集團高層亦被貼街招中傷抹黑，黑幫氣燄囂張，何止係打壓新聞自由，簡直視法紀如無物。
傳媒嘅職責係監察政府，同埋報道社會真相，惡勢力恐嚇傳媒，等於與成個社會為敵。正如多名立法會議員及行政會議成員話齋，黑幫以貼街招方式勒索富豪，根本就係挑戰法治，當局應該盡快破案。記者出身嘅立法會議員劉慧卿對傳媒因揭發社會黑暗面而遭報復感到痛心，指新聞界有責任報道社會真相，有人惡意報復，無論針對機構、高層人員或者記者，都係令人齒冷嘅行為；佢促請警方投放更多資源及精力追查案件，除咗拘控負責貼街招嘅匪徒，更要將負責「出主意、畀錢指使」嘅幕後黑手一網成擒。
冇錯嘞，打蛇打七寸，擒賊先擒王。警方亦知道事態嚴重，連日來採取行動追剿「貼街組」，日前仲直搗旺角街招印刷工場，將成條生產鏈連根拔起，仲拘捕五名上海仔嘅手下添。不過咁，當局一日未捉到幕後主腦，隨時會放虎歸山，後患無窮（o架）。咪以為係小事吖，貼街招恐嚇勒索嘅惡行愈來愈猖獗，而且有常態化趨勢，黑幫膽大包天，隨時連警方都被貼街招勒索都似。
當然喇，出得嚟行，預咗要還，作奸犯科係唔會有好下場嘅。正如法律界人士話齋，貼街招恐嚇勒索係嚴重罪行，幕後主腦固然會被重判，行動者或其他參與者一樣走唔甩，一經定罪，最高可被判囚十四年，如果街招內容含有恐嚇傷人或殺人嘅意思，更可能觸犯串謀傷人及串謀謀殺罪，最高可被判處終身監禁添。
講到底，邪不能勝正。雖然香港烏煙瘴氣，妖孽當道，但正義傳媒絕對唔會被嚇倒，必定會繼續秉着為民喉舌嘅宗旨，鍥而不捨揭露真相，伸張正氣。順便一提，最近假難民問題愈演愈烈，備受各界關注，連港府都承諾要檢討相關機制，其實都係由東方報業揭露咋。
總而言之，第四權不容打壓，惡勢力不容姑息。香港假假地都係法治之區，如果坐視黑幫勢力為所欲為，作奸犯科，唔止新聞自由危危乎，法治招牌都隨時不保嘅咋！