香港一向以購物天堂同美食天堂著稱，可惜隨着劏客醜聞不斷，問題食品氾濫，早就冇呢支歌仔唱咯，今時今日香港「享譽」國際嘅，反而係「假難民天堂」，都咪話唔諷刺。
就尋日之嘛，警方喺大嶼山拘捕九名南亞人蛇，前日喺沙頭角亦拉咗十三名南亞人蛇，兩日之內有二十多名人蛇入境，認真唔講得笑。查實舊年七月至今至少截獲一百六十多名南亞裔人蛇，而今年一月份未完，六十多名人蛇被拉，其中兩人更加係嚟自恐怖活動猖獗嘅阿富汗。唔好忘記，呢啲只係斷正嘅數字，有幾多漏網之魚進入市區，真係冇人話得埋。
係人都知，九成九以上滯留香港嘅免遣返酷刑聲請人士被證實與酷刑無關，打黑工賺錢已經夠離譜，佢哋近年仲變本加厲，部分人作奸犯科，甚至被黑社會招攬作爛頭蟀，成為本港治安嘅毒瘤。有立法會議員炮轟，元朗、流浮山以及洪水橋等地區寮屋租金低廉，吸引大量假難民聚居，經常同居民發生衝突，搞到民怨載道，而深水埗等地區情況亦唔好得幾多。大家不妨諗吓，家陣免遣返聲請嘅難民積壓個案已逾一萬一千宗，加埋幾乎日日都有人蛇非法入境，香港想唔陸沉都幾難。
好嘞，假難民源源不斷，問題尾大不掉，港府到底有咩對策呢？施政報告提出增加入境處人手，加快難民甄別程序，新增兩個首長級職位負責檢討難民政策，又話唔排除會退出聯合國《禁止酷刑公約》。保安局就話，檢討一有結果，就會盡快落實開位計劃。講就咁講啦，你知港產官僚出名議而不決，決而不行，到底全面檢討難民政策係咪得個噏字，大家不妨放長雙眼（目及）實。
唔係功夫茶翻舊帳，假難民禍港嘅種種亂象，本報好早已經作出跟蹤報道，連環踢爆。連關注團體都話，佢哋喺社交網站分享嘅文章，十篇有八篇都係本報嘅報道，港府如果早啲做嘢，又點會搞成今日咁吖。
冇錯，處理難民積壓個案需要時間，檢討退出公約亦冇可能一時三刻成事，但唔代表當局可以翹埋雙手等運到。有人建議當局聘用在港出生或持香港身份證嘅南亞裔人士協助處理，有人建議為難民證件設時限，同時設立禁閉式難民營，減少對社區嘅滋擾，呢啲建議屬行政措施，見效快，值得港府認真考慮o架。
話時話，今年施政報告嘅其中一個主題係「促進和諧」，計功夫茶話齋，如果繼續任由人蛇長驅直入，假難民胡作非為，「促進和諧」就冇嘞，「促進混亂」就有之！