傳說神農氏嘗百草，一日遇七十二毒，得茶而解。不過咁，今日問題食品氾濫成災，無奇不有，睇怕連百毒不侵嘅神農氏都未必頂得順吖。
唔係誇張o架，一般嘅問題食品大家見得多，連據講可以治百病嘅膨魚鰓（即蝠鱝鰓）亦暗藏殺機，都咪話唔諷刺。係咁嘅，近年內地掀起一陣膨魚鰓熱，傳聞有好多種療效，除咗可以增加乳汁分泌，仲可以清血毒、治療水痘、扁桃腺炎及清肺，甚至可以對抗癌症添，幾乎被視為萬能藥，唔怪得愈來愈搶手，搞到相關魚類數量急劇下降。
膨魚鰓係咪真係咁神奇呢？中醫師係咁講嘅，膨魚鰓冇錯係有清熱養陰之效，但療效同金銀花、連翹、黃柏呢啲常見中藥相差無幾，由於非主流藥材，唔單止好腥好臭好難食，而且多數含有重金屬，好少中醫師採用。
咁又係吖，今時今日環境污染嚴重，水源唔乾淨咯喎，膨魚鰓都幾難獨善其身。呢嗱，有外國傳媒踢爆，動物保護組織嘅檢驗發現，喺廣州清平市場出售嘅膨魚鰓含有砷、鎘、汞及鉛等重金屬，而且含量均已達到危險程度，問你怕未。
係人都知，隨着河流及海洋污染日益惡化，魚類吸收大量重金屬物質殘留體內，尤其魚鰓負責過濾浮游物，更加係污染高危部位。人類攝取過量重金屬，後果可大可小，除咗慢性中毒，亦可能會傷害肝、腎及腦等器官，甚至有致癌風險。所以話，說話唔可以亂講，嘢更加唔可以亂食，以為服用膨魚鰓可以醫治百病，隨時得到反效果，冇病變有病，小病變大病，咁就大鑊喇。
講起唔知好笑定好嬲，自從膨魚鰓被吹捧為萬能藥後，內地嘅搶購潮愈演愈烈。動物保護組織統計顯示，九成九膨魚鰓交易喺華南城市進行，過去十年交易量一直持續增長，行業總值達到三千萬美元，利之所在，有人甚至專門走私膨魚鰓搵食，搞到相關魚類幾乎絕種咁滯。正如環保人士話齋，生物最大嘅敵人就係人類，當有一種生物被傳有益，短時間內就會畀人大量捕捉，好快就會滅絕。尤其係中國人乜都唔放過，甚至連鹽也盲搶一番，更加乜都冇得剩喇。
無論點都好，人與天地萬物共同生存於大自然，應該尊重所有生命，和諧相處，唔能夠為咗一己之欲，隨便毀滅物種。就以膨魚鰓嚟講吖，即使可以清熱養陰，療效同其他中草藥相差無幾，點解要盲目搶購呢？再講吖，唔少膨魚鰓受到重金屬污染，根本唔適宜服用，如果為咗所謂保健而搞到病從口入，咁就弄巧反拙喇！