五代十國係中國歷史上最混亂時期，當時有個權貴叫馮道，為咗做官，卑躬屈膝，先後侍候五朝十個皇帝，成為厚顏無恥嘅代名詞。來到今日，香港亦有個現代版馮道，一樣咁厚面皮。
冇錯嘞，講緊嘅咪就係人稱「廢鑊」嘅周一嶽囉。講起周一嶽嘅衰嘢，真係罄竹難書，佢做食物及衞生局局長時，已經渾渾噩噩，「每周一鑊」，結果眾望所歸，無得留低。點知佢做官上癮，被現屆政府翻閹做平機會主席，短短兩三年就搞到烏煙瘴氣，醜聞不絕。好嘞，平機會主席任期就快結束，港府早前高調宣布就新人選展開公開招聘，而且煞有介事成立六人遴選委員會，大家以為終於可以送走瘟神喇，點知遴選名單居然包括周一嶽，你話佢係咪不知羞恥為何物吖？
話說立法會政制事務委員會日前討論消除歧視性小眾諮詢小組報告，多名議員炮轟周一嶽立場偏頗，不公不正，係歷屆最受爭議嘅平機會主席。有人唔覺意爆大「鑊」，透露周一嶽已報名參加新主席招聘遴選，據講續任機會仲好高添，問你服未。
無恥嘅人見得多，未見過好似周一嶽咁厚面皮嘅。係人都知，佢執掌平機會咁耐，醜聞就爆足咁耐，亂花公帑、攬權自肥、打壓異己，是非多多，添煩添亂。周一嶽無能不特止，仲鍾意無事生非，淨係推動性傾向歧視同「族內歧視」，已經搞到滿城風雨，爭拗不絕，佢唔引咎辭職不特止，家陣仲企圖爭取連任，繼續禍港殃民，唔通真係要搵掃把掃佢至肯走？
所以話，將周一嶽比喻為現代版馮道，簡直影衰咗馮道。馮道雖然無骨氣，但總算做過唔少實事，而且本身有咁上下能力，否則都唔會有咁多皇帝重用佢喇。反觀周一嶽除咗醜事壞事之外，幾乎無做過一件正經事，簡直係如假包換嘅廢官。如果畀佢成功連任，香港隨時仲混亂過五代十國都似！
講到底，周一嶽之所以可以留低獻世，除咗因為面皮夠厚之外，亦因為港府有眼無珠。周一嶽聲名狼藉，早已淪為政治負資產，當局翻閹佢做平機會主席，根本係自埋炸彈，自取其辱。唔通香港真係咁缺乏人才，一定要搵廢鑊做平機會主席？有人就講得啱嘞，如果港府再次委任周一嶽，反映當局一錯再錯，與民為敵，盞衰多幾錢重嘅咋。
一句講晒，周一嶽官癮大，為禍更大，如果畀佢繼續留喺平機會獻世，香港想唔亂上加亂都幾難。老實講，港府民望低迷，施政艱難，本來已經自顧不暇，仲要孭上周一嶽呢個政治負資產，唔淪為過街老鼠至奇吖！