食安標準大落後 把關不力更添憂

香港以國際都會自詡,乜都話要符合國際標準,其實根本係吹水唔抹嘴。唔使講咁多,淨係食物安全條例就唔符合國際標準,樣樣落後不特止,有啲甚至連第三世界都不如添。正如「東方報業民意調查」顯示,多數受訪者批評港府對食物安全監管寬鬆,罔顧公眾健康,搞到問題食物無日無之,港人冇啖好食。

就以反式脂肪嚟講吖,美國已經將相關材料剔出安全名單,限期三年內全面禁用。反觀港府到依家仲係放任自流,唔止冇加強監管,反而掩人耳目,只要每一百克固體食物含有不超過零點三克反式脂肪,就可以標籤為「零反式脂肪」,擺明誤導消費者。大部分受訪者認為本港食物安全條例過時,標準寬鬆,唔係冇理由(口架)。

咪以為反式脂肪問題唔大吖,醫學界人士警告,攝取過量反式脂肪會增加人體內嘅壞膽固醇,而壞膽固醇不斷累積,可能引發血管硬化及栓塞,導致中風、心臟病及腎病。最恐怖嘅係,唔少港人喜歡嘅食物都係反式脂肪嘅重災區,例如菠蘿包、蛋撻、奶茶等等,甚至連標榜健康嘅植物牛油亦唔例外。仲有吖,港府對基因改造食物只推行自願標籤制度,而唔係好似外國咁強制標示,分明又係一個食安漏洞。

見微知著,家陣食物安全問題多多,反式脂肪及基因改造食物零監管只係冰山一角咋。呢,繼舊年爆發鉛水風波及多宗食物安全事故後,最近本報又揭發連串問題食物,包括黑心茶葉、毒海鮮、毒瑤柱等等,簡直係五花八門,無奇不有。

最不可思議嘅係,本港針對食物重金屬含量嘅法例已沿用三十幾年,唔止嚴重落後,部分標準甚至比內地及國際寬鬆二十至六十倍。而爆發鉛水危機後,當局仍然冇諗辦法堵塞漏洞,當被問到幾時至會收緊食物含鉛標準時,港產官僚居然話未有時間表,仲要研究吓先喎。喂,食物安全關乎人命,咁都拖拖拉拉,仲有冇離譜啲吖?正如上述調查顯示,多數受訪者批評港府並非急市民所急,官僚卸責,得過且過。

嗱,群眾眼睛係雪亮嘅,港產官僚墨守成規,食安條例幾十年如一日,等於攞市民生命健康較飛咋。今時今日問題食物氾濫成災,大陸係咁,台灣亦係咁,夾喺中間嘅香港亦難以獨善其身,尤其係本港食安條例落後,漏洞多多,而港府又把關不力,求求其其,更加令人防不勝防。

港產官僚都識講喇,民生無小事,食物安全更加唔係小事,當局究竟幾時至肯正視問題,收緊標準堵塞漏洞呢?

第一手消息請下載on.cc東網iPhone/iPad/Android/Windows Phone Apps