俗語有話，你嘅砒霜，就係我嘅蜜糖。立法會瘋狂拉布，拖累經濟，阻礙民生，搞到怨聲載道，港府同反對派因為咁而互相指摘，掀起一場口水戰，點知喺呢個時候，居然有洋人對香港拉布大感興趣，唔通被港人視為禍胎嘅拉布，有人當成法寶，特登來港取經？
唔係講笑，英國國會議員正在訪問香港，佢哋最關心嘅唔係最近鬧到滿城風雨嘅失蹤事件，亦唔係一國兩制落實情況，而係立法會拉布，詢問點解經常響鐘點算人數、點解議員唔出席會議、立法會運作係咪出咗問題等等。係人都知，英國係現代民主發祥地，亦係最早實行代議政制嘅國家，家陣居然好似小學生咁向香港立法會拉布取經，不恥下問，香港真係巴閉咯。
查實拉布並非香港原創，外國議會一樣有拉布機制，只不過被視為政治博弈中嘅撒手鐧，屬於非常手段，非萬不得已都唔會隨便出手。而香港就氾濫成災，係又拉布，唔係又拉布，立法會淪為拉布會，點會唔睇到人瞠目結舌吖。
最離譜嘅係，立法會唔止拉布成風，仲經常流會，好多議員連會都唔開，白逗人工，簡直離晒大譜。正如高官話齋，立法會議員每個月收取九萬元人工，四年任期結束後仲有六十萬元任滿酬金，理應履行憲制責任，積極開會。可惜嘅係，呢班政客不務正業，你有你不滿，佢有佢拉布，唔係要求響鐘點人數，就係提出中止待續議案，一旦流會就可以離場哈皮，簡直爽到暈。大家有眼睇，版權修訂條例拉布戰僵持咗兩個月，立法會已經三度上演流會鬧劇，跟住嘅高鐵同港珠澳大橋追加撥款，一樣被拉布狙擊。咁不負責任嘅議員，如果換着其他地區，早就被人掃地出門，仲點可以留喺度為禍人間？
所以話，唔止外國議員唔明白，好多香港市民一樣唔明白，點解打工仔唔返工會被炒魷，而立法會議員唔開會卻無人能奈其何？點解履行憲制責任淨係部分議員嘅責任，另一部分就可以肆意妄為？點解民意代表有破壞冇建設，唔將香港搞死就唔安樂？民主、民主，多少罪惡假汝之名而行。瘋狂拉布就係假民主之名，行破壞之實，難怪外國政客都自嘆不如喇。
當然喇，立法會烏煙瘴氣，外國人奇怪嘅嘢仲有好多。嗱，議會政客最鍾意拉布策動流會，就算難得坐定定開會，個人喺度，個心都唔喺度，唔係掟嘢就係爆粗，唔係瞓覺就係睇AV，咁筍嘅工，外國議員恨唔到嘅嘞。