昨日之日不可留 今日之日多煩憂

「棄我去者,昨日之日不可留;亂我心者,今日之日多煩憂。」李白嘅詩句正正係今日香港人嘅心情寫照。二○一五年政治爭拗不絕,經濟民生問題一大堆,搞到家嘈屋閉,永無寧日;而展望二○一六年,同樣係挑戰多多,隱憂重重,一啲都唔樂觀。正如「東方報業民意調查」顯示,多數受訪者擔心未來一年政治爭拗阻礙施政,經濟前景不妙,市民生活唔安定。

新年應該有新希望,市民最想政府優先處理乜嘢問題?答案係房屋、經濟、民生及教育。咁又係吖,如果呢啲同市民息息相關嘅問題解決唔到,今年都幾難有好日子過,尤其係美國已進入加息周期,樓市固然首當其衝,整體經濟亦唔慌好得去邊,如果港府繼續無所作為,社會繼續紛紛擾擾,香港注定冇運行嘅咋。

正所謂,悠悠萬事,民生為大。喺所有民生問題中,房屋問題最頭痛,樓價升到高不可攀嘅地步,莫講基層市民負擔唔起,中產階層一樣望樓興嘆;加上公屋供應嚴重短缺,輪候冊申請者大排長龍,就快突破三十萬大關,三年上樓目標早就成為大隻講。雖然美國加息後,本港樓價近期稍為回落,但對於好多基層市民嚟講,安居樂業仍然係遙不可及嘅夢想。

除咗房屋問題難以解決,經濟前景同樣滿布陰霾,特別係旅遊業不景,消費市道疲弱,更加隱憂重重。大家有眼睇,訪港旅客人數已經連跌六個月,其中消費力最高嘅內地客跌幅最大,零售業有乜可能唔面對寒冬吖。正如唔少受訪者擔憂,農曆新年後可能出現企業倒閉及裁員潮,進一步拖累經濟及民生。

最弊嘅係,隨着香港愈來愈政治化,港府施政寸步難行,就算有心解決經濟及民生問題,都無能為力喇。上述調查顯示,大部分受訪者除咗擔心政治爭拗拖累民生,亦擔心治安及法治受衝擊。唔係杞人憂天㗎,反對派政客喺議會阻頭阻勢,已經夠煩夠亂,加上激進勢力抬頭,成個社會走向偏激及暴戾,搞到有人製造炸彈,有人喺立法會門外縱火引爆,都咪話唔大鑊。

所以話,一個社會陷入政治泥沼,就冇可能有太平日子。香港近年發展停滯不前,競爭力跌跌不休,連過去引以為榮嘅基建工程都烏龍百出,咪就係政治因素作怪囉。周邊城市紛紛爬頭,香港繼續蹉跎歲月,只會進一步沉淪嘅咋。

無論點都好喇,新嘅一年有新嘅開始,希望香港多啲建設,少啲爭拗,多啲和氣,少啲戾氣,起碼可以耳根清淨吖,係咪!