正所謂，秋高氣爽夢中見，北風催促來冬眠。近排天氣轉涼，正適合冬眠，不過凡事都有例外，好似今日舉行嘅渣打馬拉松咁吖，七萬多名選手冒住寒風參加，熱情可嘉，值得一讚。
係人都知，港人工作繁忙生活緊張，好多人連休息時間都唔夠，莫講話做運動。日前有項調查發現，一成四受訪者近半年來冇做過任何運動，就係最佳證明喇。所以呢，渣馬反應愈來愈踴躍，唔止參加人數年年破紀錄，而且成為一年一度嘅國際盛事，都算難得咯。
可以見到，渣馬唔單止吸引本地跑手，唔少外國健兒亦趨之若鶩，特別係今屆賽事獲國際田聯升呢為「金級賽事」，與日本東京及美國波士頓馬拉松同級，首十名選手更可以獲得今年巴西奧運嘅入場券添，唔怪得咁墟冚喇。
咪以為馬拉松只係體育活動咁簡單，經濟效益亦非同小可（口架）。從賽事冠名贊助費、到馬拉松博覽會等周邊活動，以至各地跑手嘅食宿消費，絕對唔係小數目。例如一三年芝加哥馬拉松，參加嘅海外跑手中有四分之一是首次踏足芝加哥，為當地增加唔少旅遊等相關收益；又例如紐約馬拉松，一○年賽事就帶來二十六億港元收益。至於世界盃足球賽及奧運會等頂級國際賽事，經濟效益就更加唔使多講喇。
其實唔使講咁遠，淨係澳門每年一度嘅大賽車，就吸引幾萬名捧場客，未計旅遊收入，淨係廣告同門票收益已經相當可觀。唔怪得近年關於「體育經濟學」嘅研究大行其道，各國愈來愈重視體育方面嘅投資，內地政府最近更宣布大幅增加體育產業投資，目標係喺二○二五年將產值由現時三千億元人民幣增加到五萬億元人民幣，認真大手筆。
反觀港府一味等運到，開口埋口吸引過夜旅客，其實，與其嘥心機舉辦乜嘢投射光影表演，或者打造動漫樂園，不如專心搞一兩場類似渣馬嘅體育盛事仲好喇。話時話，今年十月本港將首次舉辦電動方程式賽車，照計應該幾吸引，最怕當局捉到鹿唔識脫角，又搞到唔湯唔水，甩甩漏漏，咁就嘥氣喇。咪話功夫茶潑冷水，近年港府舉辦大型活動，幾乎次次都烏龍百出，笑話多多，反而由民間體育組織及商業機構合辦嘅渣馬搞到有聲有色，一年勝過一年，簡直不可相提並論。
所以話，只要精神不滑坡，辦法總比困難多。香港成日畀人話景點十年如一日，來來去去三幅被，導致旅遊業無以為繼，其實事在人為嘅啫，好似渣馬咁成功，如果當局識得好好利用，大力推廣，絕對係旅遊業一大賣點o架。