聖誕過後，相信唔少愛美之人都會有少少罪咎感，事關佳節期間豪飲豪食，要減磅唔係咁易嘅咋。其實計功夫茶話齋，磅可以慢慢減，但如果浪費食物做「大嘥鬼」，咁就真係罪過嘞！
係人都知，本港垃圾圍城危機水浸眼眉，堆填區其中四成棄置量就係來自廚餘。環保署一三年煞有介事推出《惜食約章》，呼籲減少製造廚餘，至今已有四百六十六個機構響應。咁究竟有冇成效呢？有酒店除咗設置廚餘分類設施，亦會按訂枱數量預備食材，結果廚餘由一一年嘅每日平均五百至五百五十公斤，減至現時每日平均三百五十至四百公斤，部分廚餘仲會製成魚糧，食得唔好嘥。該酒店今年訂下減少廚餘百分之三嘅目標，依家已經超額完成，都算有啲成效嘅。
除咗酒店食肆，唔少簽署約章嘅學校成績亦相當唔錯。有飯盒供應商由以往預製餐盒供應午餐，改為即場派飯，同學鍾意食幾多就裝幾多，結果學校嘅剩食由每日平均六十磅減少到四十五磅，供應商計劃未來三年將學校參與率提高至三成咁話。
冇錯嘞，只要從日常生活習慣開始，每個人行多步，減廢都唔係咁難啫。好似啱啱過咗嘅平安夜咁吖，有組織喺深水埗發動「平等分享行動」，鼓勵市民將唔要嘅物資捐贈畀有需要人士，既幫到人又環保，都幾有意義o架。
當然喇，淨係市民出力係唔夠嘅。正如環保人士話齋，《惜食約章》只係自願性質，講到底都要港府推出相應政策督促機構減廢，至可以收到更顯著嘅效果。
可惜吖，港府其身不正，冇積極減廢不特止，仲帶頭做大嘥鬼。就講《惜食約章》吖，環保署之前曾邀請十二個政府部門簽署，點知其中八個部門要到審計署審查至肯參與，食環署同房屋署更加死都唔肯簽。食環署轄下街市每日製造大量廚餘，最應該以身作則，依家反而關人個關，仲有冇再離譜啲吖。咁都未算，港府斥資一千六百多萬元興建嘅九龍灣廚餘試驗處理設施，最初宣稱每日可處理四噸已分類廚餘，但審計署調查後揭發有人報大數，實際處理量連零頭都唔到。唔怕唔識貨，最怕貨比貨，南韓嘅廚餘回收比例幾乎達到百分之百，反觀香港只有不足百分之一，簡直相形見絀。
始終都係嗰句，地球人人有份，環保個個有責。各國連最具爭議嘅減排目標都可以達成協議，港府仲有咩藉口翹埋雙手乜都唔做呀！