糞便臭彈攻立會 物以類聚襯到絕

立法會被人叫「垃圾會」,真係實至名歸o架。嗱,繼日前大樓外發生垃圾桶縱火爆炸案,尋日議事廳內又發現糞便,咁搞法,何止烏煙瘴氣,簡直臭氣熏天喇。

話說立法會帳目委員會尋日就廚餘減量及循環再造問題展開公開聆訊,會議進行期間,有議員突然大呼「有冇搞錯」,原來其座位枱底發現糞便,搞到一褲都係。立法會秘書處大為緊張,即刻派職員清理,並取走樣本化驗,又即時全面檢查所有會議室同翻查閉路電視,話會加強保安喎。

所以話,一百歲唔死都有新聞,立法會居然被糞便攻陷,你話成何體統吖?正如有議員話齋,立法會保安明顯出現漏洞,今次畀人放糞便,下次容乜易被人放刀片?其實,家陣香港激進勢力抬頭,有人走火入魔,唔係衝擊呢度就係佔領嗰度,唔係放火燒垃圾桶就係自製菠蘿,加上立法會好似無掩雞籠咁,任何人都可以自出自入,有反對派政客甚至做埋「帶路黨」,隨時畀人放菠蘿都似,點止刀片咁簡單吖!

冇計喇,有點樣嘅議員,就有點樣嘅議會,今日嘅立法會七國咁亂,唔係拉布,就係流會,唔係爆粗,就係掟嘢,唔出事至奇喇。都係古人講得啱,物必先腐而後蟲生。立法會民望跌跌不休,咪就係因為政客其身不正囉。

講開又講,立法會淪為垃圾會,自己衰就算喇,仲要騎劫整個社會,簡直害人害物。呢,港珠澳大橋工程延誤,超支五十幾億元,尋日立法會工務小組加會審議,點知又遇到反對派拉布,而且提出休會動議偷襲成功,會議開始不足半小時就宣布散檔。你話嘞,政客政治掛帥,為反對而反對,連民生議題都唔放過,香港點會有運行吖?

港珠澳大橋追加撥款仲係小事,高鐵呢個財政黑洞點樣填補,先至係大件事。當局表明,如果高鐵工程爛尾,已經投入嘅七百億元公帑隨時付諸東流,將來重啟工程仲要額外增加三百幾億元,最後整項工程需要過千億元埋單喎。言下之意,無非希望立法會對追加撥款高抬貴手,可惜吖,反對派政客根本唔會關心呢啲。

一句講晒,香港之所以搞到今日嘅田地,港府無能固然責無旁貸,政客無良更加難辭其咎。終審法院前常任法官列顯倫批評有人濫用司法覆核制度,浪費公帑,阻撓施政,令整個社會付出沉重代價。其實,政客濫用權力,拉布成災,社會付出嘅代價仲大喇。

正所謂,人以群分,物以類聚,政客同糞便一齊開會,都可以話係襯到絕咯!