以前古裝片經常出現呢幕經典場面，忠義之士含冤下獄，大限之日被押往刑場斬首，千鈞一髮之際，突然遠遠傳來欽差大臣嘅叫聲：「刀下留人！」於是好人得到拯救，冤案得到平反，正義得到伸張。尋日，香港亦發生類似嘅一幕，不過大叫刀下留人嘅唔係明鏡高懸嘅青天大老爺，而係縮骨卸膊嘅混帳官僚，出手無非為咗補鑊咋。
功夫茶講緊乜？咪就係沙田龍華酒店續牌事件囉。擁有七十七年歷史嘅龍華酒店食肆牌照今年六月到期，店方一如以往申請續牌，點知被食環署同消防處當波咁踢來踢去，一時要求遞交新防火圖則，一時要求更新消防裝置或將布局還原至四十年前嘅模樣，搞到店方無所適從，續牌遙遙無期，東主無奈之下惟有準備結束呢間見證沙田大半個世紀嘅老店。事件經《東網》報道後，隨即引起社會廣泛關注，喺尋日即係續牌限期最後一日，龍華終於正式獲當局發出一年臨時牌照，至少可以營業至明年年中，總算暫時逃過一劫。
當局今次刀下留人，並唔係良心發現，更加唔係皇恩浩蕩，只係為自己嘅醜態補鑊。龍華酒店係本港碩果僅存嘅園林式酒家，其首創嘅紅燒乳鴿更加遠近馳名，當年李小龍等巨星亦成為座上客，《唐山大兄》甚至喺度取景，可以話係港人嘅集體回憶，港產官僚唔識寶都算喇，仲要扼殺生存空間，添煩添亂，點會唔招人反感吖。當局家陣知衰，急急發出臨時牌照，講得好聽啲叫做亡羊補牢，講得唔好聽就係唔衰攞嚟衰！
講起真係混帳，公僕唔係服務市民，而係刁難市民，唔係對商戶提供支援，而係對商戶落井下石，咁就唔怪得本港營商環境愈嚟愈惡劣喇。呢，有飲食業人士踢爆最近收到唔少投訴，業界辦理牌照時被相關部門無理拖延，以前續牌幾乎係「自動生效」，依家隨時要等一個月以上，有申領新牌個案更加被拖足半年添，簡直匪夷所思。食肆打開門口做生意，燈油火蠟樣樣要錢，續牌或發牌受阻隨時損失慘重，唔火滾就假咯。業界講得啱o架，當局制度僵化，官僚作風盛行，搞到業界難以經營，隨時官逼民反都似！
都係嗰句喇，國家之敗，由官邪也。香港之所以每況愈下，烏煙瘴氣，政客搞風搞雨，唯恐天下不亂，固然係原因之一，但最主要嘅原因始終係官僚顢頇，搞到亂象叢生，民怨載道。今屆政府上場以嚟，經常強調「穩中求變、適度有為」，但事實係庸官卸責之風不變，劣吏懶散繼續無為，試問咁又點能夠改善管治呢？
一句講晒，龍華終能逃一劫，官僚作風何時滅。喺行政、立法、司法三權皆亂嘅今日，作為第四權嘅傳媒監察角色顯得更加重要，龍華酒店得以薪火相傳嘅故事就係最新例子嘞。