俗語有云：生不入官門，死不入地獄。其實今時今日，應該改為生不入醫院就差唔多。尤其係屯門醫院，醫療質素每況愈下，緊急手術死亡率冠絕全港，問你怕未！
係咁嘅，醫管局每年都會審核各公立醫院嘅表現，最新一期《外科手術成效監察計劃》揭露屯門醫院緊急手術表現差劣，再度淪落榜尾，排名係所有公立醫院之中最低，即係死得人多咁解，都咪話唔得人驚。
話時話，近五年屯院嘅排名都差強人意，一直喺榜尾徘徊，最差試過一年有九十四宗術後死亡個案，即係不足四日就有一宗，大家都見怪不怪咯。雖然上個年度忽然回勇至「合理表現」，可惜只係曇花一現咋。就算係非緊急手術，屯院嘅表現亦唔好得幾多，曾有兩個年度排喺榜尾，講起都醜怪。
醫院係救死扶傷嘅地方，偏偏病人入院好似搵命博咁，簡直匪夷所思。屯院作為新界西聯網龍頭醫院，照計冇理由咁差o架，到底原因出喺邊度呢？該院外科部門主管係咁講嘅，屯院係龍頭醫院，處理嘅外科手術量十分驚人，一四/一五年度手術總數達一萬五千多宗，平均每日處理超過四十宗，手術室早已不勝負荷。加上醫護人手嚴重不足，至今仍有十個外科醫生空缺未填補，只能依靠同一聯網嘅博愛醫院分擔緊急手術。無計可施下，明年博愛醫院每日增多一節緊急手術，希望有助「疏散」病人喎，效果究竟係點，仲要睇過至知。
所以話，公立醫院人手短缺，「十個煲六個蓋」，點可能唔出事吖。正如立法會議員話齋，新界西一直面對「先天不足」嘅結構性問題，由於區內缺乏私營醫療機構，病人被迫一窩蜂擁向屯院求診，令人手不足問題進一步惡化。最離譜嘅係，醫管局明知屯院問題多多，依然闊佬懶理，任由資深醫生不斷流失，所謂增加人手一味齋噏，只係依靠缺乏經驗嘅醫科畢業生頂檔，諗起都牙煙。
冰凍三尺，非一日之寒，醫院聯網資源分配不均嘅積弊存在已久，早就唔係新聞咯。七大聯網之中，港島東獲得嘅資源一向最多，新界西雖然唔係最少，但計埋人口分布，早就不敷應用，醫療面前人人不平等，亂象叢生又有乜出奇吖。港府話就話要改革醫管局，仲計劃花三年時間、耗資十一億元落實醫改建議添，可惜換湯不換藥，聯網制度千瘡百孔，呢個問題一日唔解決，無論點樣檢討，點樣改革，都係嘥氣嘅咋。
今時今日，公立醫院打錯針、斷錯症、配錯藥、開錯刀……事故層出不窮，無奇不有，病人只能望天打卦，自求多福！