天下本無事，庸官自擾之。港產官僚眼高手低，施政亂象叢生，搞到爭議多多，無事變有事，小事變大事，大事變危機，真係唔到你唔服。
呢，全港性系統評估（TSA）就係典型例子喇，事件擾攘咗成個月，到依家都未知點收科。教育局煞有介事舉行研討會，邀請家長出席發表意見，本來被視為救火行動之一，點知結果反而引起更多非議，被批評選擇性諮詢，將反對機制嘅家長拒諸門外。關注團體揚言今日會喺立法會公聽會場外舉行馬拉松式集會示威，要求當局取消評估機制，睇嚟件事仲有排煩。
撲火變點火，你話教育局係咪無能吖？當年國教爭議引起巨大風波，可以講係政治角力嘅結果，無可避免，而評估機制又唔係乜嘢重大事件，當局咁都無法拆彈，搞到滿城風雨，簡直匪夷所思。學古人話齋，過而不能知，是不智也；知而不能改，是不勇也。當局渾渾噩噩，後知後覺，評估機制演變成今日騎虎難下嘅局面，何止係不智不勇，直情係不該添喇！
即係咁，姑勿論評估機制係咪有存在價值，既然引起咁大反彈，已經足以證明機制出咗問題，當局點能夠輕描淡寫（口架）？冇錯，學生嘅學習能力需要定期評估，學校課程亦需要因時制宜，全港性系統評估本來係無可厚非嘅，之不過咁喎，評估機制變質變味，淪為學校瘋狂催谷學生嘅工具，早就備受非議，如果當局真係為學生着想，應該盡快研究改善，而唔係擇惡固執，唔嗲唔吊。學校都有教喇，與時並進吖嘛，評估機制實施十一年，係時候作出檢討，教育官僚唔好再扮鴕鳥喇。
講起唔知好嬲定好笑，港產官僚施政甩漏，唔止烏龍百出，連補鑊都唔識，次次都係愈補愈衰。古人話，經一事，長一智。港產官僚啱啱相反，無論經過幾多次教訓，吃過幾多虧，依然係冥頑不靈，一次又一次犯錯，一次又一次出醜。呢，教育局局長吳克儉喺國教風波同鉛水事件中淪為眾矢之的，以為佢今次會認真拆彈喇，點知又係令人失望，搞到連今日立法會公聽會都唔敢現身，唔怪得畀人稱為「唔得掂」喇。
話時話，避得初一，唔避得十五，港產官僚表現差劣，始終都要面對現實，係咪應該定期接受系統性評估呢？如果官僚覺得壓力太大，咪自動消失囉，唔會有人反對（口架）！