包庇護短演鬧劇 愈描愈黑枉出醜

物以類聚,人以群分,政客互相包庇,狼狽為奸,早就見怪不怪。但好似黑金醜聞咁,多名反對派議員收取壹淫媒前主席淫賤黎秘密捐款,結果統統獲放生,咁就真係令人嘆為觀止喇。

係咁嘅,淫賤黎被踢爆喺兩年幾內向反對派秘密捐款逾四千萬元,五名現任立法會議員李卓人、梁國雄、梁家傑、毛孟靜及涂謹申有份收錢,但就冇按規定申報,引起社會嘩然。其中李卓人及梁國雄被立法會議員個人利益監察委員會立案調查,即使兩人口供矛盾,疑點重重,最後仍被裁定相關投訴不成立,問你服未。

咁又難怪嘅,議監會三名反對派委員同李卓人及梁國雄本來就係一丘之貉,自己人查自己人,唔放生至奇吖。正如有團體話齋,李卓人涉嫌侵吞捐款利息,而梁國雄唔止有洗錢之嫌,更有偽造文件之嫌,兩人操守分明都有問題,咁都話投訴不成立,證明議監會黑箱作業,完全信唔過。

其實,反對派政客包庇護短,唔止黑箱作業,簡直就係侮辱公眾智慧。難為醜聞主角李卓人仲喺度狡辯,聲稱款項係工黨委託佢保管,有關利息係工黨同佢之間嘅事,涉及款項少,毋須討論。另一位工黨議員何秀蘭亦加埋把口,指涉及嘅利息相信只有數十元喎。

咁都得?當年有位隧道公司職員工作期間執起地下一元硬幣放入褲袋咋,就被檢控盜竊罪,結果唔止要自簽守行為,仲被炒魷魚添。李卓人身為立法會議員,收取秘密捐款冇申報不特止,仲涉嫌私吞利息,咁又該當何罪吖?平民百姓執一元都有事,唔通立法會議員可以「超然於」法律?

所以話,議監會嘅所謂調查根本就係一場鬧劇。最匪夷所思嘅係,淫賤黎嘅秘密捐款全部經過其親信Mark Simon之手,佢先至係主要人證,點知議監會三名反對派委員居然運用否決權拒絕傳召呢位洋人作供,你話佢哋有乜難言之隱呢?唔通擔心勾結外部勢力內幕穿煲?若要人不知,除非己莫為,外部勢力無孔不入,呢啲黑金話就話係淫賤黎捐出來,其實來歷不明,認真追查落去,隨時爆出更多醜聞,呢啲可能就係反對派拒絕傳召Mark Simon作供嘅真正原因啩。

有人就講得啱,議員收取捐款十四日內冇申報已違反議事規則,今次議監會嘅決定帶來惡劣先例,廉政公署應該盡快徹查事件。冇錯嘞,政客靠得住,豬乸會上樹,反對派臭味相投,沆瀣一氣,旨意佢哋追查真相,等於與虎謀皮咋;要撥亂反正,清除黑金,惟有寄望廉署依法辦事,高舉反腐利劍,將牛鬼蛇神一網打盡。