正所謂，人衰行路打倒褪。家陣香港七國咁亂，社會爭拗不斷，政治紛紛擾擾，連大型基建工程都搞到一鑊泡，幾乎無一不延誤，無一不超支，淪為一個個財政黑洞，港珠澳大橋就係最佳例子嘞。
係人都知，港珠澳大橋工程問題多多，幾乎肯定無法如期喺一六年完工。更弊嘅係屋漏偏逢連夜雨，本報發現大橋香港口岸及相關連接路工程，再有合約延期截標，涉及口岸嘅車輛自動清關支援系統。今次已經係工程自一一年上馬以來，第九個延期截標嘅項目，涉及金額合計近三百六十億元，延誤時間由兩星期至三個月不等，有啲更加係一延再延，真係唔到你唔服。
唔使問阿貴，工程愈拖愈長，造價只會愈來愈高。正如有立法會議員話齋，各項工程環環相扣，連環延期截標勢將拖累施工進度，延誤大橋通車日期，加上建築成本不斷上升，令超支機會大大增加，最終都係由納稅人填氹。
唔係杞人憂天o架。雖然當局一味死撐，強調合約招標期間，因應需要延長截標日期係慣常做法，對整體進度唔會造成太大影響，但就唔肯交代相關合約預計完工日期。其實，當局一早已打定輸數，所謂唔會造成太大影響，根本就係自欺欺人。
再講喇，即使主體工程如期落成，周邊配套設施跟唔上，到頭來都係嘥氣嘅啫。好似全長九公里、大橋香港段主要工程之一嘅屯門西繞道咁，莫講話動工，連走線方案、環評報告都未見影。有地區人士擔心，將來大橋通車後，區內交通網將難以負荷額外車流量，隨時逼爆都似。
講開又講，港珠澳大橋問題愈揭愈多，愈揭愈臭，港府早排預計工程將會超支五十多億元，睇怕都係靠唔住o架喇。唔好忘記，港珠澳大橋只係本港基建亂象嘅冰山一角，高鐵、西九文化區等大型項目，超支郁吓幾十億元，咪話唔得人驚。有人計過數，近幾年大型基建工程合共超支過千億元，係咁倒錢落鹹水海，識印銀紙都唔掂喇。
點解搞成咁？之唔係前朝曾蔭權爵士好帶挈囉。佢當年好大喜功，一口氣推出所謂十大基建，完全冇考慮工程一窩蜂上馬會推高建築成本。人哋就話前人種樹，後人乘涼，家陣變成前人種禍，後人遭殃，你話係咪無辜吖。
講起都幾唏噓，香港向來以效率著稱，當年千億元玫瑰園計劃話做就做，點知回歸後一蟹不如一蟹，政府弱勢低效，淨係一條港珠澳大橋都烏龍百出，笑話多多，唔通香港真係氣數已盡？