俗語話，遲到好過冇到。港府終於對伊波拉疫情提升防範措施，功夫茶當然樂見其成喇，問題係本港社會家陣好似中咗不知名病毒咁，政治發高燒，官僚軟無力，防疫救災嘅中樞神經系統更加嚴重受損，係咪真係能夠阻擋世紀瘟疫入侵，實在令人無法樂觀囉。
唔係靠嚇o架，伊波拉正以燎原之勢向全球蔓延，唔止佔領西非，仲登陸歐美，反映疫情已經全面失控，睇怕唔使幾耐就會殺到亞洲同中國。諷刺嘅係，世衞被踢爆低估危機，前線人員無如實反映疫情，以致錯失防疫時機，呢一幕驚心情景同當年沙士何其相似，當時內地瞞報疫情，港府淡化問題，結果演變成社區爆發，香港淪為疫埠，死傷枕藉，唔通歷史真係會重演？
伊波拉疫情臨門，港產官僚日前終於喺睡夢中扎醒，急急召開跨部門會議，宣布一連串加強防疫措施，包括向到過或來自疫區嘅旅客派發健康監察問卷、加強前線醫護人員穿卸保護衣物程序訓練，以及收緊呈報病例準則，但凡到過疫區且發燒達攝氏三十七點五度嘅病人，均須呈報等等。表面睇，港府嘅補鑊措施面面俱到，無懈可擊，不過可惜吖，呢啲防疫措施好似港產官僚一樣，統統得個樣嘅咋，靠佢哋把關，隨時死得人多。
就講旅客健康監察問卷吖，本來可以起到追蹤旅客同病源嘅作用，不失為一個重要防疫措施，可惜當局自毀長城，既無強制旅客填寫，又無增加人手檢疫，咁咪即係嘥氣。最畀港產官僚吹脹嘅係，佢哋聲稱呢類旅客每日只得十五個咁大把喎，既然係咁，點解唔索性強制填寫呢？點解要留下漏洞呢？唔好唔記得，當年沙士透過一個「患怪病」嘅廣州中醫師入侵香港，造成空前浩劫。前車可鑑，如果伊波拉要突破港府防線，唔使多o架，只要走漏一個帶菌者，已經足以令香港陷入萬劫不復之地！
功夫茶有時真係懷疑衞生官僚係被虐狂，所以一次又一次做出捉蟲行為，一次又一次惹人炮轟。係人都知，防疫關乎人命，把關寧緊勿鬆，措施再多再嚴都唔會過分，但係太少太鬆就必定埋下隱患，當局明知故犯，攞市民嘅生命健康較飛，何止抵鬧，簡直抵打。咪話功夫茶唔提醒，伊波拉窮兇極惡，來勢洶洶，比沙士更危險，港產官僚繼續掉以輕心，遲早爆大鑊嘅咋。
不過話時話，港府防疫懶懶閒，大家早就見怪不怪咯。呢，本報早前踢爆，當局對疫情危機零設防，口岸中門大開，醫院防線鬆懈，社區衞生惡劣，你話港府處於高度戒備狀態都無人信喇。
屋漏偏逢連夜雨，佔中鬧劇未知幾時落幕，新一齣伊波拉驚慄片又強勢上演，香港正處於內憂外患時期，唔該港產官僚認真防疫，千祈唔好又添煩添亂吖！