一個地方嘅沉淪，往往有迹可尋。呢句說話真係冇講錯，今日香港特別多怪事，立法會拉布流會鬧劇唔講嘞，淨係高鐵工程延誤咋，就揭出一大堆醜聞，港府及港鐵被指唱雙簧欺騙市民，搞到滿城風雨，公眾要求交代真相，政客乘勢追殺，最後都唔知點收科。
即係咁，高鐵醜聞究竟點收科，仍有待下回分解，功夫茶今日想講嘅係另外一單怪事。話說大角咀海富苑有住戶受木蝨困擾超過三年，房屋署束手無策，一味噴滅蟲劑了事，完全解決唔到問題。一位行動不便嘅獨居阿伯形容，木蝨一到夜晚就走出嚟，令佢冇覺好瞓，惟有見一隻撳死一隻。而鄰居就擔心木蝨傳播力高，隨時蔓延到其他單位，導致人人自危。
其實，海富苑木蝨為患已非一朝一夕嘅事。房屋署係咁講嘅，一二年到上述單位探訪時發現有衞生問題及蝨患，已酌情協助租戶滅蝨及進行家居清潔，其後又安排多次滅蝨喎。可惜吖，滅嚟滅去都係得個吉，木蝨唔止冇少到，反而仲多咗添。食環署承認，自一二年中至今，共接獲八宗海富苑居民受木蝨滋擾嘅投訴；而地區人士接獲嘅投訴更加多達十二宗。即係話，蝨患唔係單一事件，早就蔓延開去咯。
正如滅蟲專家話齋，噴滅蟲劑只係治標，根本冇可能杜絕到木蝨，要徹底解決蝨患，首先要安排租戶遷離單位，並將傢俬及其他雜物丟棄，然後徹底清潔全屋。咁做嘅代價雖然不菲，但相對於木蝨可能蔓延到全屋苑甚至全港，點都係值得嘅，問題係房屋署肯唔肯做啫。
講開又講，香港到處藏污納垢，又點止海富苑木蝨為患吖。早前有位女學生喺學校應考中學文憑試，結果被跳蝨咬到遍「腿」鱗傷，痛癢難忍，完全無法專注考試，搞到教育局要提醒校方確保試場衞生，簡直笑死人。好多人以為落後地區先至有蝨患，點知香港呢個所謂先進國際城市，居然一樣搞到木蝨肆虐，跳蝨橫飛，唔止笑大人個口，直頭係失禮死人！
正所謂一污俱污，海富苑木蝨為患，只不過係整個香港藏污納垢嘅縮影咋。橫街窄巷固然係蛇蟲鼠蟻嘅安樂窩，即使熱鬧繁華如中環，都試過光天化日有老鼠咬傷外國女遊客。鬼咩，雖然清潔香港運動搞咗幾十年，奈何港府只係當騷嚟做，有乜辦法唔愈搞愈污糟吖？嗱，大家記得十一年前沙士啦，當時以「清潔大隊長」貪曾為首嘅一眾高官，又掃地又抹牆，又話要清理全港所有衞生黑點，可惜風風火火一輪後一切照舊，搞嚟搞去又係得個吉，衞生黑點打回原形，唔怪得有人話香港已經淪為臭港、垃圾港啦。
古人話治大國如烹小鮮，功夫茶就話治香港如治木蝨，如果港府官僚連木蝨咁小蟲為患都束手無策，仲夠膽話適度有為？萬一第日沙士咁嘅世紀疫症重臨，豈不是香港末日？