船毀人亡悲未已 車毀人亡更堪憂

冇錯，交通事故可大可小，一隻輪船嘅舵手判斷出錯，會危及數以百計嘅乘客性命，一間交通機構嘅掌舵人缺乏危機意識，就更加會危害成千上萬嘅乘客安全，好牙煙o架！所以咯喎，功夫茶要問一問港鐵嘅一眾掌舵人，你哋瞌完眼瞓未呀？

港鐵又又又又又發生嚴重事故。尋日朝早，港島線上環總站隧道內一塊金屬蓋部分鬆脫，懷疑擊中一列列車嘅車頭玻璃，搞到來往上環至金鐘嘅列車服務中斷逾兩小時，大批上班族被困途中，焗住遲大到。唔使講，港鐵隧道死火，玩殘乘客，結果梗係怨聲載道啦。

嗱，港鐵列車班次頻唔頻密，功夫茶唔知，但係加價同事故頻密到冇朋友，就係人都知。俗語話，久病成醫，港鐵成日出事，頻頻跪低，次次搞到乘客怨聲載道，照計執生功夫應該練到爐火純青至啱o架。殊不知，今次補鑊又係甩甩漏漏，喺遲遲冇對外公布事故之下大批乘客繼續湧落車站，令到金鐘站同轉車要塞北角站人頭湧湧，一片混亂，期間仲有多名乘客不適添，幾攞命呀。

港鐵最新宣傳口號係「入閘後忍忍口」，但係乘客已經忍夠嘞，究竟港鐵幾時至會生生性性，唔再成日出意外呀？咪睇看似無傷大雅嘅小錯漏，意外嘅嘢冇人講得埋，一次電線短路，一條電纜斷裂，一個金屬蓋脫落，都隨時可能釀成奇災巨禍，造成死傷枕藉。正如事前夠冇人估到，兩船只係一撞，就撞出驚天海難，奪走三十八條寶貴人命。更何況，港鐵嘅載客量比客船多出唔知幾多倍，一旦出大事，後果簡直不敢想像。

功夫茶唔係杞人憂天o架，歷史告訴世人，天災同人禍往往係分唔開嘅。香港家陣踏入多事之秋，政治紛亂，奸邪為患，事故災難亦危機四伏，防不勝防。港鐵管理粗疏，運作混亂，唔係呢度甩轆，就係嗰度甩漏，咁搞法，遲早車毀人亡o架咋！

沉船災難悲未已，港鐵安全復堪憂。講嚟講去，大海航行靠舵手，港鐵事故醜聞不絕，禍因就係掌舵人偷懶瞌眼瞓，所以至搞到港鐵事故不斷，亂象頻生。有關注團體話，為咗加強阻嚇，當港鐵發生重大事故，應該施以罰款，以儆效尤。其實計功夫茶話齋，咁都未夠o架，應該加埋減港鐵管理層人工，甚至炒佢哋魷魚！唔係咩，如果唔狠狠摑醒呢班港鐵掌舵人，港鐵邊有希望重回正軌呀！