政府伸出橄欖枝 得民心者得天下

九月九,搞一搞,立法會選舉已經塵埃落定嘞,雖然民主黨一落千丈,公民黨亦損兵折將,不過激進民主派抬頭。最鍾意大吵大鬧又左掟右掟嘅人民力量由兩席大躍進為三席,增幅係百分之五十,你都咪話唔架勢。激進民主派抬頭對於本地議政文化有乜嘢影響呀?外界有一個解讀係咁嘅,自稱絕不妥協嘅人民力量有大市場,原因係特區政府過於弱雞,施政作風不得民心之下,普羅大眾咪走去支持強硬反對派囉,話之佢反對嘅理由係硬繃繃定係硬膠膠。

成日話政治係妥協嘅藝術,之但係身為執政者嘅一眾高官都要有提供妥協嘅條件先至得,否則你想妥協都冇人睬你啦。舉個現成例子吖,七年前吹住口哨上台嘅前特首曾蔭權民望高到嚇死人,當時不可一世嘅佢梗係有資格同人妥協啦,一到七年之後臨收工嘅時候變得民望低殘,莫講話冇人願意同佢玩妥協嘅藝術,簡直係個個都唔妥佢。

好嘞,新官上任嘅梁振英政府有冇資格玩一玩妥協嘅藝術呢?要回答呢個問題,不如睇睇一單新聞。特首梁振英昨日中午宴請新一屆立法會議員,大約四十名議員畀面出席,即係大約三十名議員缺席。出席嘅泛民主派議員只有莫乃光、李國麟以及馮檢基等等,其他一概自動失蹤。社民連嘅長毛梁國雄係就係有現身,不過一如慣例係到場請願,要求取消國民教育,增設全民退休保障,唔好阻撓保釣人士出海。長毛未等到宴會開始已經離開,以身體語言顯示不受嗟來之食。

既然泛民議員出席率咁低,分明係杯葛啦,馮檢基喺宴會之後就被問到,係咪預期未來行政同立法關係緊張呀?馮檢基就話嘞,從呢個角度睇係有可能嘅。

換言之,梁朝政府可以玩妥協嘅空間相當有限,反而激進民主派前途無限,只要高舉反政府旗幟,大批粉絲就會一呼百應。弱國無外交吖嘛,所以弱雞政府就無社交嘞,請人食飯都冇人到。

其實計功夫茶話齋,與其討好政客,不如討好市民。正所謂咯喎,得民心者得天下,只要梁朝政府真真正正做到「民生無小事」,處處以民眾利益為依歸,激進民主派自然冇市場,反對都冇咁大聲啦。

問題係,前朝政府遺禍太深,留低一個二個政治炸彈,收拾爛攤子確係需要時間。咁啦,功夫茶免費呈獻一個溫馨提示,若然房屋政策做得好,蝸居一族個個安居樂業,包保特區政府嘅民望好似啪咗偉哥咁堅挺呀,弱雞都可以飛上枝頭做鳳凰!