鑑於水貨客問題愈來愈嚴重，海關近日同內地當局及北區警方合作打擊水客，行動會持續到年底。遲到好過冇到，政府終於肯做嘢，梗係好事喇，但最緊要雷厲風行，有始有終，唔好好似前朝政府咁敷衍了事，一陣風吹過就算。
本來，無論消費定係旅行，北上係港人首選之一。弊在堪稱全世界最繁忙、人流最多嘅港深口岸已經畀水客兵團攻陷，變咗地球上最擠迫、最恐怖嘅過境通道，過關慘過打仗，北上淪為噩夢。
港深口岸近年人流不斷增加，除咗香港人，仲有內地個人遊、雙非孕婦、跨境學童，早已經不堪負荷，再加埋陣容愈來愈鼎盛嘅跨境水客大軍，有乜法子唔亂過亂世佳人吖。
嗱，喺重災區上水東鐵站，裏裏外外已經全線淪陷，變咗行人勿近嘅「水客專用區」，早晚無休。車站內，水客拉住裝滿貨嘅車仔橫衝直撞，旁若無人，其他乘客一個唔小心，隨時「中招」受傷。車站外，居民同樣深受其害，行人天橋、車站通道統統塞到爆，出入好似劉翔跑百一米跨欄咁款，周圍環境更加畀人搞到污糟邋遢，影響市容。
水客大軍壓境，唔止影響市民，口岸工作人員壓力亦瀕臨爆煲，幾乎得閒死唔得閒病，多次要求增加人手「救亡」，點知當局一直置若罔聞，闊佬懶理。
更令人擔心嘅係水客逼爆口岸仲衍生政治問題，激化中港兩地矛盾添。呢，內地本來打算放寬個人遊，容許多個城市非戶籍居民「一簽多行」，但引起本港社會強烈反彈，原因之一就係擔心水客問題進一步惡化，口岸更混亂。查實水客入面好多都係香港居民，同個人遊完全無關。
水客問題唔係今日至出現，至弊港府多年來隻眼開隻眼閉，關人個關，尤其曾蔭權爵士任內根本冇做好自己份工，留低呢個計時炸彈。就講番放寬個人遊呢筆，佢為咗打造政績向北大人攤大手板，收咗大禮之後又冇推出相應措施配合，卒之搞到一鑊泡，呢啲咪叫累人累物累街坊囉。
要回復口岸安寧，過境暢順，必須標本兼治，除咗打擊水客兵團，清理過關亂象，最緊要做好全面規劃，一方面同內地密切配合，同時加強配套設施，多管齊下，先至可以事半功倍。呢，澳門當局舊年得到廣東省邊防部門協助，喺拱北口岸加強管理，從嚴打擊走私活動，水客少咗一半，口岸亂象即刻消失。澳門做得到，點解香港做唔到？
功夫茶都係嗰句，主人要招待客人，先要執乾淨間屋，呢啲係最基本嘅待客之道。水客擾民問題唔解決，口岸一年三百六十五日立立亂，係人都對香港敬而遠之喇！