官方怠慢單車徑 孖轆騎士傷亡勁

自從香港出咗一個單車王子黃金寶,再加上一個「牛下女車神」李慧詩,喺倫敦破天荒贏得一面奧運女子凱林賽銅牌,單車運動愈來愈普遍,大朋友同小朋友都受到感染。大家試下周末去郊區觀察一下吖,真係有好多人扶老攜幼踩單車為樂o架,觸目所及隨時兩個轆多過四個轆。

之但係咁,樂極好多時候係會生悲嘅,正如早幾日有人喺西貢塔門玩浮潛打魚,一個唔覺意就屍沉大海,幾無辜呀。所以咯喎,踩單車同其他運動一樣,安全第一命長久,千祈唔好做出任何估你唔到嘅危險動作,譬如唔好盲舂舂衝紅燈,更加唔好膽粗粗踩上高速公路。功夫茶親眼見過有人將架「人包鐵戰車」踩上屯門公路,嚇到你心肝仔卜卜跳。

鑑於單車騎士頻頻出事,警方將於今日起展開一個全港單車安全運動,喺多個地點派發宣傳單張,推廣單車安全訊息,並且加強執法,檢控違例人士。

踩單車嘅出事率有幾高呢?根據警方數據顯示,今年頭八個月涉及單車嘅交通意外共有一千六百三十九宗,導致一千五百四十名單車人士傷亡,較去年同期嘅一千四百八十一宗以及一千三百九十五人都上升一成。呢八個月裏面,六名單車人士死亡,雖然較去年同期減少四人,不過仍然係一個非常可怕嘅數字。

警方提醒孖轆騎士,路上踩單車同樣受到《道路交通條例》管制,責任同一般駕駛者無異,必須遵守交通法例以及照顧其他道路使用者。常見單車違例事項包括,冇遵從交通標誌或者道路標記嘅規定,行人路上踩單車,運載其他人或任何妨礙視線嘅動物,能見度不足或晚間冇亮起燈號。

講咗咁耐,功夫茶想問一問特區政府,講好嘅完整單車徑呢?大家可能知道香港有好多單車徑,尤其新界地區比較多,但係未必知道一個非常可怕嘅事實,香港嘅單車徑好似斷橛禾蟲,係一截一截唔完整o架。譬如話你想由屯門踩單車去荃灣,對唔住,呢一段旅程係冇單車徑嘅。

即係咁,孖轆騎士本來喺單車徑馳騁,一去到冇單車徑嘅地方,惟有心口掛個勇字頂硬上踩出馬路,危險性不言而喻。喂,馬路如虎口呀,萬一發生交通意外,你估邊個傷得重啲又邊個死得快啲?當然係形同以卵擊石嘅單車人士啦!

所以咯喎,減少單車傷亡嘅辦法除咗加強宣傳教育,最好係盡快提供完整嘅單車徑,官老爺千祈唔好再態度怠慢吊吊揈。係呀,官樣文章冇錯係話會改善單車徑,問題係實際上未見到囉。唔想孖轆騎士傷亡勁,好心快快鋪好單車徑!