曾幾何時，中國貧窮落後，中國人飽受洋人歧視。估唔到大國崛起嘅今日，中國人依然遭受歧視，而且係喺香港，仲係提倡開放包容嘅大學添，你話係咪不可思議吖！
係咁嘅。話說上月底，一名城市大學外籍行政人員喺宿舍草地曬太陽，遇着一班內地教職員帶同小朋友到草地附近耍樂，外籍職員覺得受到滋擾，忽然大庭廣眾爆粗鬧人，內容涉嫌帶有種族歧視成分，內地教職員不甘受辱，憤然向校方投訴。
城大話喎，校方收到投訴後，已經成立調查委員會嚴正調查今次事件，會視乎情況考慮是否轉介平機會處理。其實，身為大學行政人員，理應知書識禮，做好學生嘅榜樣，唔好話種族歧視，淨係爆粗鬧人已經有辱斯文，教壞細路啦。
話時話，城大已經唔係第一次發生歧視風波啦：○二年爆出法律學院歧視中文著作事件；前年涉嫌禁止地盤工人入餐廳食飯，被網民圍轟歧視基層勞工；早前又要求碩士生選科時向外地生讓路，被指歧視本地學生。一件污，兩件穢，再咁落去，校譽想唔受損都幾難。點解會發生咁多醜聞？咁就問城大喇，睇嚟該校真係要好好檢討一下。
大家千祈唔好低估種族歧視吖，後果可大可小，因此引發嘅衝突同悲劇不知凡幾。納粹德國屠殺六百萬猶太人等陳年舊事唔講嘞，一向和平嘅挪威去年發生槍手大屠殺事件，震驚全球，起因咪就係種族歧視、盲目排外囉。
睇番香港，本來係一個自由開放、中西薈萃嘅地方，無論西人或華人，香港居民或內地同胞，一向互相包容、融洽共處、和衷共濟。可惜近年來血濃於水嘅中港同胞好似水火不容咁，我話你係蝗蟲，你鬧我係狗，甚至有人想將個人遊旅客拒諸門外，可見中港矛盾急劇惡化，而且變得愈來愈情緒化，任何一件小事都可能引發軒然大波。
諷刺嘅係，依家連大學校園都發生種族歧視風波，而且係洋人歧視華人。開講有話，大學之道，在明明德，在親民，在止於至善。如果堂堂大學連族群和諧共處都無法做到，仲點樣追求學術開放、思想自由，又點可能做到明德格物，止於至善呢？
一句到尾，唔該城大同平機會切實跟進，盡快查清事件，還受害人公道。須知道，種族歧視非小事，星星之火可燎原，萬一搞到中港矛盾火上添油，絕對唔係講玩o架！