自從人類發明咗電燈之後，夜生活就多姿多采嘞，最低限度行路唔會因為伸手不見五指而仆崩鼻。之但係咁，電燈必須用得其所，用得太多太濫不但浪費電力，仲會加劇令人瞓唔着嘅「光害」。你知啦，好多觀星發燒友最討厭香港燈火通明，光到幾乎一粒星都見唔到。至於其他電器，長開都會浪費電力，而且十分不環保，事關發電廠係會排放廢氣o架。
好嘞，曾蔭權作為特區之首，係咪應該以身作則節省電力呢？應該當然係應該啦，問題係，呢一位哥哥仔有名你叫「氣候逃犯」，環保概念睇怕差過所有專門敗家嘅二世祖。本報踢爆，煲呔曾所住嘅禮賓府原來係一間極之浪費電力嘅怪獸屋，電費每月接近二十萬元，足足係一個中產家庭嘅二百倍！
嗱，有實際數據o架。○八至○九年度，禮賓府用電量約一百九十萬度，○九至一○年度升至約一百九十七萬度，按年上升百分之三；一○至一一年度進一步升至一百九十七萬三千度，電費支出高達二百三十五萬元，即係每月接近二十萬元。呢一個用電量簡直驚天地泣鬼神，即使將政務司、財政司、律政司三座官邸加加埋埋，用電量都不及禮賓府三成。
禮賓府有冇必要用咁多電呢？曾蔭權點解做一個嘥電天王呢？功夫茶真係唔知具體原因，淨係知道用得電多就會進一步摧殘已經滿目瘡痍嘅地球。喂，香港嘅空氣污染夠晒恐怖啦，亂咁浪費電力製造更多廢氣，曾蔭權何止係「氣候逃犯」呀，分明就係「氣候殺手」！
講到空氣污染，真係唔知好嬲定好笑。環境局左搞右搞，係就係終於宣布計劃收緊沿用四分一世紀嘅空氣質素指標，不過新指標仍然非常落後，遠遠不及世衞嘅最嚴格要求。環境局建議嘅新空氣質素指標，加入微細懸浮粒子PM2.5數值，每二十四小時每立方米上限設於七十五微克，不單止係新加坡同美國嘅一倍，連孟加拉嘅六十五微克都不如。
咁嘅所謂新指標，唔見得有決心改善空氣污染，難怪環保團體唔收貨啦。健康空氣行動執行總監蔡淑儀質疑，制訂超寬鬆指標旨在減少超標日數，無視公眾健康。地球之友認為，政府未夠決心提出長遠符合世衞指標嘅時間表。
莫講話禮賓府浪費電力，好多官方機構都係光害之源。就好似立法會綜合大樓咁吖，照明裝置太強，燈火長期通明，唔知幾多電力白白浪費。
如果話禮賓府係怪獸屋，曾蔭權當然係怪獸啦，怪獸透過浪費電力摧殘地球，鬼唔望真係有個鹹蛋超人出嚟打怪獸！