女士貪靚就話流行排毒啫，目的係美顏，正所謂，排毒美顏好，人老冇煩惱。勢估唔到，原來一幢新簇簇嘅立法會大樓，居然都要排毒，而目的又唔係美顏喎，講出嚟都真係笑死街坊。
事緣本報早前獨家報道揭發，落成啟用不久嘅立法會綜合大樓淪為「毒氣室」，室內充斥有毒物質總揮發性有機化合物TVOC，含量超出正常標準百幾倍，於是乎建築署急急腳展開一輪換氣計劃，即係排毒咁解。長期吸入相關毒氣嘅後果可大可小，男會不育，女會乳癌，造成「男無後女無胸」嘅危機。你知啦，立法會議員假假地都算得上係社會精英，如果搞到無法繼後香燈，香港下一代可能就咁少咗幾個優質人口。
排毒效果如何呢？好不幸，換氣計劃成效不彰，部分樓層仍然危機四伏。專家估計有毒物質嘅源頭係新傢俬，總揮發性有機化合物TVOC會不停釋出，即使每日換氣都作用不大，快則幾個月、慢則半年時間先至能夠完全排毒。換言之，立法會裏面工作嘅相關人等有必要做一做「人肉吸毒機」，未來幾個月都要硬吸毒氣。
到底係咪風水問題呢？當然係啦，風水風水，今次真係災風禍水。空氣即係風，有毒物質充斥室內即係災風。至於禍水咯喎，講嘅係新政府總部嘅退伍軍人症桿菌，源頭係水管吖嘛，咪就係禍水囉。
如果你問造成凶風惡水嘅罪魁禍首，功夫茶會同你講，一定係「門常開」嘅畸形設計，中間居然穿咗一個大窿喎，風水術語叫做「穿心煞」，你話點會唔撞大板吖！
新政府總部中空穿心，即係冇心冇肺，亦即係冇靈魂。喂，呢一個唔係曾蔭權政府嘅寫照咩？如果有心有肺有靈魂，香港家陣都唔使搞到咁嘅田地啦，監管失敗導致禍患連連。好似警隊咁吖，居然出咗一個暴虐女教師嘅賤警，騙情騙色都不特止，仲要當對方係人肉提款機，起勢榨取錢財。強將手下無弱兵，君子手下無賤人，上樑不正自然下樑歪，做大嘅冇心冇肺冇靈魂，做細嘅就會變得無情無義無心肝。
講番新政府總部禍水事件吖，有議員質疑政府及各公營機構從未加入優質食水認可計劃，又要求水務署為所有新落成樓宇檢驗是否含有退伍軍人症桿菌。亦即係話，禍水唔止侵襲門常開咁簡單，仲有可能遍布全港，有必要關注各公營及私營樓宇免受惡菌肆虐。
唉，政府總部穿心，災風禍水齊來，下屆特首如果唔洗心革面搞一搞心肺復甦，再想辦法令到靈魂歸位，香港呢一塊福地隨時土崩瓦解！