有個英國人寫過本《改變世界的二十六個字母》，介紹Ａ到Ｚ嘅字母體系點樣奠定西方文明基石。搞笑嘅係，呢廿六個英文字母雖然可以主宰世界，但阻止唔到香港陸沉。
大家千祈咪搞錯吖，功夫茶唔係話英文冇用，而係話英文字母唔夠用。係人都知港人身份證號碼以一個英文字母開頭，但有樣嘢未必人人都知，原來由上世紀八十年代起，港產嬰兒嘅出世紙同身份證號碼完全一樣。
咁有乜問題呢？問題就係英文字母得廿六個咁大把，出世紙號碼就快唔夠用喇。眾所周知，近年內地孕婦湧港產子數字激增，令包括「雙非」嬰兒在內嘅新生港嬰數字成倍急升，由以前每年四至五萬名增加到舊年嘅九萬幾，今年因為龍年效應，估計數字更加會大增。先唔講其他，最直接影響就係，單字母出世紙號碼買少見少，依家剩番約三十萬個，估計三、四年後就會用盡。據講，入境處正研究唔同方案，包括使用雙字母做出世紙號碼開頭嘅可行性喎。
講真，出世紙號碼嘅問題好易解決啫，單字母用晒，咪用雙字母甚至三字母、四字母咯，根本冇乜所謂，最多難記啲啫。依家最大問題係，本港資源有限，唔可能雙倍、三倍甚至四倍咁增加，雙非問題再唔解決，香港遲早陸沉嘅咋。
話時話，近年因為雙非嬰兒數字激增，首先逼爆醫院產房，跟住逼爆母嬰健康院，然後到北區幼稚園及小學學位緊張，家陣連出世紙號碼嘅英文字母都要打孖上，可見增幅驚人。唔怪得「雙非」變成近排兩個最惹火嘅中文字，搞到火頭四起，衝突不斷，港無寧日。喺咁嘅情況下，北大嗰個狗噏教授仲火上加油，令中港居民矛盾更加惡化，簡直豈有此理！
嗱，大年初二有多個團體操上新政府總部同港府「開年」，示威人士直指煲呔曾早排提出所謂「四招」堵截內地孕婦衝關，治標不治本，有人要求釋法，有人要求修改《基本法》，一勞永逸解決雙非問題。
講真，解鈴還須繫鈴人，港府當年種下惡果，依家唔主動提請人大釋法不特止，仲袖手旁觀，睇住雙非問題不斷惡化，兩地居民衝突無日無之，你話係咪不負責任吖。
今日雙英字母，明日雙倍負擔。出世紙號碼唔夠用事小，香港資源無以為繼事大，夕陽政府就快壽終正寢，旨意煲呔曾有所作為盞嘥氣。如果下屆特首唔盡快收拾呢個爛攤子，唔使等三、四個英文字母出世紙出現，香港已經陸沉！