媽咪生日 大帝豪派30分占士屠龍賀壽
「大帝」勒邦占士尋日面對速龍攻入30分，而韋迪亦有25分進帳，兩兄弟領熱火以95比89擊敗速龍，將勝利送給「大帝媽」哥莉亞作為43歲生日禮物。戰罷今場比賽後，占士明早就要再遇母會騎士，面對「新大帝」艾榮，以熱火強勢，料騎士好大機會成為炮灰，熱火讓8.5分照捧上盤。（廣東體育頻道周三早上8時30分直播）
香港時間2月5日係「大帝媽」哥莉亞43歲牛一，所以「大帝」賽前就在twitter上留言：「生日快樂，媽媽！到今日我都仲未知你點可能以一個單親媽媽身份湊大我，感謝上帝能成為你個仔，我永遠都冇法報答你，永遠愛你！」不過占士其後還留了一句：「無論別人說甚麼都不會改變我對你嘅睇法，我永遠不會對你抱怨任何事。」「大帝」之所以咁講，估計係因為哥莉亞最近被指周圍「溝仔」，連熱火隊友都唔放過。
韋迪都有25分進帳
熱火今場面對速龍贏得輕鬆，三節過後已領先13分，最後以95比89輕取速龍。占士今場繼續擔任頭號得分點，個人攻入30分及9個籃板，但可惜因為掛住得分而忘記助攻，「大帝」今場只係交出2次助攻，令開季連續24場得15分、5個籃板及5次助攻嘅數據斷纜。隊友韋迪亦有25分貢獻，而保殊面對舊東家則表現一般，13射僅3中得12分。
遇母會騎士冇面畀
熱火連勝兩場後，明早將會遇上占士母會騎士，後者今季獲得狀元艾榮加盟後，成績有所進步，今季亦有機會衝擊季後賽。不過「大帝」自從離開騎士後，受盡母會球迷及高層奚落，舊隊友亦變成陌路人，「大帝」又點會念舊放過佢哋，預計熱火今場大炒可期，讓8.5分都照捧上盤。本報綜合報道
NBA賽果熱線：2795 2233
查詢時間：周二中午12時至下午6時