無規不成圓，無矩不成方，所以為人處世必須有規有矩，否則方寸大亂。如果你問，全香港最需要守規矩嘅係乜嘢人，功夫茶會話係七大紀律部隊。無他嘅，紀律部隊係維護法紀嘅鐵甲雄師，如果紀律部隊唔守規矩，香港肯定七國咁亂。
大家可能會再追問，七大紀律部隊之中，最需要守規矩嘅又係邊一路英雄好漢呀？當然係廉政專員公署。喂，肅貪倡廉喎，儆惡懲奸喎，廉署若然冇規冇矩成何體統呢？貪官污吏甚至行賄買票嘅金牌練馬師睬你都傻啦！
既然係咁，廉署今鋪就離譜嘞，事關佢哋冇按規矩辦事。根據政府慣例，如果一名員工距離退休時限不足一年，通常都唔會獲准升職。哈，廉署有一個叫做貝律（Mike Burley）嘅執行處外籍總調查主任，明年中即將年屆六十歲退休年齡，今個月居然晉升為首席調查主任，引起執行處上下嘩然。呢一位貝律老兄，距離退休年齡只有八個月貨仔咋，臨老先至飛上枝頭做鳳凰，難怪內部員工強烈不滿，認為極度不公平以及嚴重打擊士氣。即係咁，老餅霸住高職等於阻住地球轉，後生一輩上位無望當然激心到嘔拔甩。
因乜事幹廉署要打破常規？聽講貝律係執行處首長李銘澤嘅愛將兼文膽，專替李首長同埋一眾高層撰寫演詞，懷疑臨退休獲升職與此攸關。另外咯喎，貝律晉升前更加獲得度身訂造簽署一份合約，容許佢延任多一年至二○一三年。
當然啦，亦都可能係廉署蜀中無大將，人才匱乏咪要挽留老臣子囉。冇耐前之嘛，執行處前首席調查主任阮律文被捕，又有多名高層人員相繼離任，青黃不接嘅問題都相當嚴重。
城市大學專業進修學院學術統籌宋立功形容得冇錯，講得好聽係人才不足，冇人壓得住場，講得難聽就係廉署冇王管！
係呀，冇王管呀，試問除咗曾蔭權之外，邊個有權管得住廉署？好衰唔衰，曾蔭權自己都唔守規矩。現年六十二歲嘅廉政專員湯顯明，○九年亦係臨近退休年齡被委以重任，曾蔭權未正式公布就鬼鬼祟祟同湯顯明續約三年。咁搞法，廉署容乜易淪為「退休樂園」㗎！
仲有呀，李銘澤本人以及執行處處長黃世照，同樣好快就要年屆六十歲退休年齡，但係政府遲遲未公布接任安排，話唔定又係夠鐘都賴死唔走。
功夫茶忽然之間產生一個極度恐怖嘅念頭，明年六月三十日現屆政府夠鐘收工，會唔會出現一個賴死唔走嘅特首㗎？如果曾蔭權磨爛蓆，七一遊行肯定爆大鑊！