唔到你唔信！左派元老曾憲梓曾經講過，做特首預咗畀人鬧到仆街。呢嗱嗱嗱，曾蔭權管治無能，市民早就口誅筆伐，可能現眼報啩，佢前日參觀添馬艦新立法會大樓時，竟然喺公眾席梯級差錯腳，幾乎當眾仆街！
即係咁，衰開有條路，曾蔭權精神恍惚，人衰行路仆樓梯，為官一樣顢頇無能，胡混度日，搞到施政一塌糊塗，民望跌到一仆一碌。主政七年，一無是處，可能煲呔曾自己都覺得醜啦，於是咯喎，佢惟有大吹特吹，為自己塗脂抹粉。
煲呔曾點樣吹呢？勁囉，佢厚顏到話港府係全球最有效率嘅政府之一，連歐美國家都追唔上，又自誇派錢六千蚊深得民心，而任內通過最低工資立法就係佢嘅最大成就咁話。煲呔曾仲話，最希望退休之後港人會記得佢係一個「誠實」嘅公僕，真係笑死人。
喂喂喂，咪玩啦，將劣績當政績，顛倒是非黑白，咁都叫做誠實？港府嘅施政效率冇錯係遠近聞名，不過係出晒名議而不決，決而不行喎，尤其近年港府淪為跛腳鴨，施政朝令夕改，重大政策唔係爛尾就係被迫跪低，話港府係全球最低效率政府先至名副其實！
至於派錢六千蚊同最低工資，唔講猶自可，講起就把幾火。「史上最廢」預算案搞到天怒人怨，港府派錢根本係為咗補鑊，而且派到甩甩漏漏，備受非議，咁都算功績？而最低工資更加係勞工界長期爭取嘅產物，煲呔曾想獨攬功勞，簡直唔知醜字點寫！
人貴自知，曾蔭權施政劣績斑斑，社會怨聲載道，佢冇反躬自省，反而自吹自擂，你話係咪真「不該」！常言道，頂天立地做人，腳踏實地做事，煲呔曾兩樣都唔係，唔怪得咁易仆街喇。
話時話，講起仆街呢家嘢，有時真係好鬼玄妙，特別係對政治人物，往往係失勢倒台嘅不祥之兆。嗱，功夫茶唔係導人迷信，真係有不少先例可循㗎。例如董建華當年出席公開活動時跌個四腳朝天，民望就開始由盛轉衰，最終仲腳痛下台添。英國前首相戴卓爾夫人當年喺北京人民大會堂外嘅驚世一跌，更加震撼全球，為鐵娘子國內失勢倒台拉開序幕。所以話啫，仆街係不祥之兆，信不信由你，反正功夫茶信了！
世事往往很奇妙，好嘅唔靈醜嘅靈，煲呔曾日光日白都可以喺立法會差錯腳，以後真係要醒醒定定，唔係嘅話，施政再有乜行差踏錯，遲早又係腳痛嘅咋！