功夫茶忠告市民，如果閣下係北上深圳尋歡作樂嘅常客，出街用膳真係要打醒十二分精神。根據內地專家估計，每十次外出食飯，總有一次中招，機會率高達一成！
中乜嘢招呀？呢家嘢講出嚟嚇到大家嘔白泡，你隨時食到由坑渠污水提煉而成嘅地溝油呀，老友！
內地黑心奸商真係好冇人性，稱之為人渣敗類絕對唔算誇張。本報記者直擊發現，撈取地溝油原材料嘅逐臭之夫非常猖獗，好似港人蒲點深圳福田食肆附近咁吖，深夜時分屢見偷油黨出沒。
記者首先見到一名男子，駕駛載有大膠桶嘅三輪車，去到一間食肆門前熟練打開污水渠蓋。之不過咁，大概作賊心虛啩，當呢一名男子見到記者舉機拍攝，即刻放低渠蓋極速逃離現場。
半小時之後，一對中年男女組成嘅偷油黨又出現，其中一人打開渠蓋，利用長柄杓子伸入渠內出力咁刮。刮呀刮，刮呀刮，大量坑渠穢物倒入膠桶，桶內全部都係烏黑黑嘅稠濃物體，而且發出刺鼻嘅陣陣惡臭。你話嘞，偷油黨係咪逐臭之夫？當記者表露身份想問一問刮坑渠嘅原因，一男一女粒聲不響閃人。
夜闌人靜鬼鬼祟祟走去刮坑渠，冇可能係工人通渠啫，九成九係提取原材料返去炮製地溝油。附近一間食肆負責人證實，偷油黨幾乎每晚出動，估計係貪圖食肆林立導致渠內油量較多。佢仲話，報過公安都冇用，公安話唔係佢哋管喎。難怪全國政協委員劉夢熊直斥，深圳政府明顯執法不力，追查地溝油並不困難，問題係有冇心掃蕩。
講真吖，應該唔止執法不力，功夫茶甚至思疑有人存心包庇。你知啦，神州大地貪官污吏特別多，一個二個見錢開眼，包庇無良奸商炮製地溝油有乜咁出奇？
地溝油有乜嘢禍害，唔使多講喇啩，總之就係食到你中毒，食到你患癌，食到你瓜柴。亦即係話，人渣敗類殘民自肥，而且不排除官商勾結，不惜害死同胞大發不義之財。
地溝油係眾多氾濫成災嘅黑心食品之一，內地因乜事幹淪為百毒橫流嘅地獄食堂？皆因中國人實在太醜陋，道德敗壞到禽獸不如。更加重要嘅係，統治階層尸位素餐，執政為民純屬謊話，謊話治國嘅後果係自取滅亡。
係呀，真係自取滅亡㗎，京老爺自己都承認，腐敗足以亡黨亡國。黑心食品一來構成民族大屠殺，二來咯喎，唔想死嘅通常會諗辦法抗爭，官逼民反可大可小㗎，中東同北非嘅茉莉花革命殷鑑不遠。
所以話啫，為人為己為社稷，取締黑心食品刻不容緩呀，官老爺！