何謂中產階級，雖然冇一個放諸四海而皆準嘅定義，不過有一家嘢可以測試一下你是否中產人士。即係咁，你有冇覺得自己有時候力不從心，而身邊完全冇人可以幫到你？舉個例子吖，你覺得屋租好鬼死昂貴，業主加租好鬼死兇狠，買樓自住又畀唔起首期，申請公屋又完全冇資格。如果你有呢一種無力感，冇錯嘞，你九成九係中產。
身為中產人士嘅你，以前或者相當風光，起碼過年過節可以魚翅撈飯。之但係時移世易咯，中產變得愈來愈慘，慘在收入跑輸大市，加薪追唔上通脹，更加慘在只有付出而毫無回報。每年最慘情嘅日子莫過於「稅月催人」嘅交稅季節，眼白白睇住辛辛苦苦賺番嚟血汗錢，攞去供養一批唔當自己係老闆嘅所謂公僕，到頭來得到嘅社會福利少過一條毛。
好彩政客有時都唔係全無心肝，立法會議員提出動議，尋日通過冇約束力嘅議案，促請政府喺稅務、房屋同醫療等等方面推出措施，減輕中產人士經濟負擔。提出動議嘅民建聯劉江華列出十幾項要求，包括增加個人及子女免稅額，提供電費補貼同埋全面資助學前教育。劉議員認為中產經常埋怨有交稅、冇福利，政府有需要照顧，以免影響政治穩定。
另外仲有議員提出修正案，公民黨關注中產向下流，工聯會同民主黨建議提供租住私樓津貼，自由黨認為退稅以及擴闊邊際稅階係最好嘅措施。
既然議員仗義執言替中產發聲，官府大老爺有乜嘢回應呢？人稱傻強嘅陳家強今次並唔傻得晒，佢老哥以署理財政司司長嘅身份表示，不會忘記中產對社會嘅貢獻，政府會提供協助，但必須確保有充足嘅財政儲備應付經濟逆轉喎。
嗱嗱嗱，各位中產難胞們請注意，立法會之內一個二個扮晒叉燒協助中產，傻強更加係誓神劈願話不忘中產，咁大家就要銘記於心，到時到候敦促一干人等兌現呢一個美麗嘅承諾。你知啦，議案係冇約束力㗎，傻強日後如果反口覆舌，你咬佢食呀？所以咯喎，大家一定要堅持到底，傻強不忘記中產，難胞請記住索還。
係呀，真係要當追收爛帳咁索還，畢竟政府欠中產實在太多。譬如你想榮升父母，哈，交咗咁多年稅居然去公立醫院預約產科都話冇位。再譬如話，你想送阿仔阿女去官立學校讀書，點知教育局一嘢縮班，心肝寶貝望門興嘆。
傻強呀傻強，麻煩閣下不忘記中產之餘，仲要不忘記承諾，否則中產發火，非同小可！