醫者父母心？冇錯，以前啲人係咁講嘅，不過咯喎，今時今日呢句說話要改一改喇，父母心已經好難見到，黑心就有大把。
唔係講緊內地，而係香港吖，五十步笑一百步，醫德淪落，中港兩地一擔擔嘅咋。呢，屯門醫院啱啱被踢爆打歪針導致一名早產嬰截肢，威爾斯醫院又被投訴懷疑「照燈」導致一名嬰兒腳骨折斷，院方仲要百般抵賴，真係鑊鑊新鮮鑊鑊甘。
件事係咁嘅。有位讀者向本報投訴，佢太太上月二十日喺沙田威爾斯醫院誕下一名男嬰，兩日後出院，但由於嬰兒黃疸指數過高，四日後又返去醫院「照燈」。點知照完燈後返到屋企，家人發現嬰兒右腳紅腫屈起，幾日後情況唔單止冇好轉，反而愈來愈惡化，於是又送去健康院檢查，又經私家診所轉介威爾斯醫院睇急症，幾經奔波之下先至證實係右小腿前方骨折。急症室醫生指出，好可能係照燈時整傷，至於點解會整傷，最大機會係碰撞所致。
不過咁，當嬰兒父母去威爾斯醫院追問受傷原因時，兒科醫生居然諸多推搪，一時話唔可以確定致傷原因及時間，一時又話急症室醫生並非專業，仲暗示可能係嬰兒屋企人或者工人照顧不足導致嬰兒骨折添，總而言之，關人個關。
所以話，今時今日嘅公立醫院真係好得人驚㗎，話就話係治病救人，實際上烏龍百出，失誤多多，隨時救人變成害人，醫你唔死算你命大。最離譜嘅係，就算出咗事，唔係瞞得就瞞，就係卸得就卸，好似屯門醫院打歪針導致嬰兒截肢咁大件事，院方居然夠膽話「不是嚴重醫療事故」。喂，害到人哋終身殘廢仲唔夠嚴重，唔通要死得人多至算嚴重？你哋仲有冇人性，有冇醫德㗎！
講番今次骨折事件，嬰兒父母已去信醫管局投訴，但威爾斯醫院就話要六個星期先至可以完成調查喎。其實，就算有調查結果又點吖，咪又係文過飾非，求其搵個理由敷衍了事，唔通醫院會主動認錯咩，唔通食衞局局長周一嶽會主動問責咩。
講起周一嶽，真係把鬼火。有人話佢每周一鑊，其實點止吖，佢做局長咁耐，公立醫院事故就一直未停過，而且愈爆愈大鑊，打錯針、輸錯血、配錯藥、割錯器官等等，無日無之，無奇不有。不過，身為問責局長嘅佢從來唔會認錯，更加唔好話問責。唉，醫療庸官尸位素餐，得過且過，公立醫院有乜法子唔烏煙瘴氣，亂七八糟吖。
講到底，上樑不正下樑歪，香港醫德淪落，皆因官德淪落，周一嶽呢啲庸官一日在位，公立醫院服務一日冇改善，病人就一日冇運行。醫院淪為閻王殿，大家最緊要自求多福吖！