嘩！原來經營私家醫院好鬼死過癮，早知功夫茶搵幾個有錢人合作食大茶飯啦。家陣正值內地孕婦來港產子潮方興未艾，接生等同執金，淨係一個婦產科已經想窮都難。
經營私家醫院有幾過癮呢？即係咁，首先你可以利用慈善團體嘅名義註冊，咁你就可以享受免稅嘅非凡樂趣。其次，衞生署依據《私家醫院、護養院及留產院註冊條例》監管，不過條例屬於上世紀六十年代嘅古董，院方財政不受管制，想加價就加價，冇人吹得你脹。
私家醫院加價之兇狠，唔講得笑㗎。好似聖德肋撒，造影檢查加幅一倍半，部分手術費加價六成。以產科套餐為例，香港港安醫院加價百分之五至八，荃灣港安加價百分之二至五，寶血醫院加價超過一成。
由於陳年舊例一直冇修改，所以就出現非常荒謬嘅情況。假設私家醫院出錯，你估最高罰款係幾多吖嗱？各位觀眾，一千大元！喂，隨地吐痰亂拋垃圾都罰款一千五百啦，垃圾蟲嘅破壞性居然嚴重得過害死人嘅庸醫劣護？功夫茶覺得衞生署好冇尊嚴囉，直情係一隻見到老鼠都唔識捉嘅病貓。
立法會尋日討論私家醫院處理醫療事故機制，多名議員批評政府監管不足，即使發生嚴重事故，院方往往擔心聲譽受損而遲報或漏報。衞生署副署長譚麗芬就話嘞，署方對於近年呈報嚴重事故數字驟降已有警惕，但冇證據顯示私院隱瞞。不過呢一位副署長承認，監管私院嘅法例過時，不能滿足社會期望，承諾會審慎檢討。
至於食衞局局長周一嶽，就話希望配合醫院認證計劃，日後修例加入相關要求，包括醫療事故嘅處理方法，預計需時三至四年完成。
嗱嗱嗱，周局長以及一眾老爺奶奶真係病貓嚟㗎，明知法例過時，明知罰款過輕，明知私院傲慢，居然仲要拖多三至四年先至有希望修改法例。私家醫院之傲慢，在於山高皇帝遠，帝力於我何有哉。監管條例廢柴吖嘛，加價又管唔到，出事又管唔到，浸會醫院唔覺意跌咗一個初生嬰兒落地，咁咪遲遲都唔通報囉，你咬佢食呀！
唉，曾蔭權講過要發展醫療產業，兩年前施政報告已經話有四幅土地可以增建私家醫院，如果病人選擇多咗，私家醫院都唔敢咁傲慢啦。可惜周一嶽永遠拖拖拉拉，不久前先至決定明年初推出黃竹坑同大埔兩幅土地公開招標，另外兩幅地皮影都未見。
所以話啫，經營私家醫院真係好鬼死過癮，事關特區政府有一班廢字輩老油條放之任之，病人變咗肉隨砧板上！