古人話，生不入官門。計功夫茶話齋，呢句說話out咗咯，政府總部都變咗示威勝地啦，今時今日令市民心驚膽戰嘅，其實係另外兩個地方至啱。
邊兩個地方呢？一個係公立醫院，早產嬰打針竟然被打錯位置，搞到截肢終身殘障，講起都恐怖！另一個地方咯喎，咪就係連鎖快餐店大家樂，你知啦，佢哋嘅衞生差到冇朋友，食物成日「加料」，蟲鼠曱甴輪流奉客，諗起都得人驚！
嗱，講起大家樂，近年真係是非不斷，醜聞不絕。好似舊年咁吖，最低工資實施前夕，居然率先剋扣員工飯鐘錢，畀全城鬧爆，「大家樂」從此又名「太刻薄」。雖然，大家樂喺群情洶湧之下不得不跪低，但已臭名遠播，唔使賣廣告都街知巷聞。
古人講得好，獨樂樂不如眾樂樂，大家樂淨係掛住自己賺大錢，冇體現「大家樂」精神，最後梗係連自己都笑唔出啦。呢，飯鐘錢風波過後，食物加料事件又層出不窮，都好大鑊㗎。
話時話，大家樂食物加料事件簿真係成尺厚㗎，尤其係獨家放送嘅「小強」菜式，簡直鑊鑊新鮮鑊鑊甘。食米粉撈出曱甴屍體，食火鍋送生猛曱甴，食午餐咩，木瓜排骨湯入面又有曱甴，真係食你唔死嚇死你！
不過，講到經典咯喎，就不得不數舊年奧海城一期分店嗰份外賣炒滑蛋雞扒早餐，有人食食吓發現唔妥，吐出一看，竟然係一隻小曱甴，屍殼已被咬開，流出透明狀內臟……「大渣落，令你嘔足一百分」，果然名不虛傳！
令你嘔足一百分嘅，除咗「小強」菜式，仲有其他特色食譜，好似菜蟲火鍋、煙頭四寶河、金屬條免治牛肉飯、透明膠紙早餐等等，五花八門，無奇不有。最恐怖嘅係，有食客喺大家樂用膳期間，一隻成個拳頭咁大嘅老鼠突然從天而降，人鼠同枱食飯，問你服未！
即係咁，曱甴又名小強，但咪睇小佢哋吖，醫學界人士警告，老鼠曱甴喜與垃圾或糞便為伍，好易向食物傳播細菌，食咗落肚輕則屙嘔，腸胃不適，嚴重則可能引致腎衰竭添吖。禍從口入，唔講得笑，難怪有食客話，如果再幫襯大家樂，要對食物驗屍咁驗先至放心。
嗱嗱嗱，學者講得啱㗎，大家樂作為有多年歷史嘅連鎖快餐店，接二連三發生食物加料事件，有負市民期望。有立法會議員更加建議食環署加強巡查，甚至檢控多次違規店舖，以儆效尤。
一句講晒，大家樂衞生惡劣，再唔改善，遲早爆大鑊咋。仲有吖，食環署繼續懶懶閒，唔監唔管，你哋都走唔甩！