好多人都話，食環署食塞米，呢個比喻冇錯係好貼切，但現實世界裏面，食環署其實係食皇糧嘅，即係用公帑出糧，係市民公僕。
點解功夫茶無端端講起食環署？開古前，睇單新聞先。地產經紀楊先生同朋友喺報檔閒聊談天，突然殺出兩個食環署職員，話要檢控佢亂拋煙頭，楊氏極力否認，為求清白，報警求助。結果點呢？警員查問食署職員，有冇親眼見到楊氏丟煙頭，你估點答呀，佢哋支吾以對，只係話見到楊氏身邊有煙頭喎！
吓，咁都得！身邊有煙頭就係丟煙頭，咁發現屍體報案嘅良好市民咪全部變晒殺人兇手？仲有吖，曾蔭權身邊宦官佞臣車輪轉，咁禮賓府主人咪成為太監阿頭？如果法官用咁嘅邏輯判案，咁就死得人多咯！
即係咁，食環署執法檢控垃圾蟲，冇人話唔啱，係本身職責添，但就算執法都要有證有據、合情合理至得㗎，冇憑冇證周街老屈，你估港產城管真係惡晒咩？咪話功夫茶篤爆，食環官僚熱衷於檢控遊戲，可能因為佢哋靠公帑出糧，捉一隻垃圾蟲進貢千五元，咪係又捉，唔係又捉囉。
好嘞，講番呢單煙頭懸案，最後點呢？港產城管口供疑點重重，牽強到連警察哥哥都唔肯受理，最後無癮離開，變相默認告錯人。你話係咪搞笑吖？一句講晒，食環官僚輕率執法，固之然自取其辱，但係枉法擾民、欺善怕惡，就更加係自拆招牌，何止食塞米，簡直自食惡果！
嗱，講到擾民，講到欺善怕惡，食環署認咗第二，都冇人敢認第一咯。呢，前幾晚一名佝僂老翁喺旺角推車仔擺檔，突然一隊小販管理隊巡至，兇神惡煞指阿伯阻街，要作檢控，充公貨物。港產城管嗰份氣燄，睇到人火滾，連路人都睇唔過眼，一名男子仗義執言，用身體攔阻食環署嘅車輛，怒斥港產城管欺凌弱小，瘦弱阿伯有牌擺檔都拉，對其他擺賣嘅彪形大漢就當時運高睇唔到，簡直係冇人性！事件引來逾百途人圍觀，最後要警方到場先至可以控制場面。
話時話，食環署官僚平日死蛇爛鱔咁，但對住自力更生嘅弱勢小販就兇神惡煞，又拉又趕，逼到跳河溺斃有之，逼到衝出馬路被貨車撞癱有之，真係豈有此理！
周街屈人丟煙頭，欺善怕惡惹民憤，功夫茶想提醒食環署，新任署長梁卓文如果唔想步前任後塵，成日畀人鬧係食塞米嘅話，就要好好整頓班手下。須知道，食環署係公帑出糧，你哋係市民公僕，唔係妹仔惡過主人婆啩！