夕陽政府冇米粥 起動隨時變跪低

煲呔曾棚尾拉箱,諗住做番齣好戲,喺最後一份施政報告開咗一大堆期票。其中一張係「起動九龍東」,聲稱要將啟德機場舊址、觀塘同九龍灣,打造成另一個核心商業區,包括起一條造價過百億元嘅環保高架單軌列車,當局仲建議將灣仔政府合署遷埋去啟德添。

九龍東變中環,聽落夠晒有諗頭,不過聽還聽,千祈咪當真呀。冇錯,中環發展空間早已經飽和,租金飆到全世界數一數二,開闢新商業區係大勢所趨,愈早搞愈有利。

問題係,跛腳鴨政府一向眼高手低,講就天下無敵,做就有心無力。推動政制改革,起錨可以變超錯,搞呢類大型基建,起動變跪低又有乜出奇噃,呢個「宏圖大計」幾時成事,真係天曉得咯。

嗱嗱嗱,計劃十畫未有一撇,港府高官已經閂定後門先喇。發展局局長林鄭月娥話喎,計劃中嘅九龍灣部分,面對最大困難係業權分散,其中一幅地更涉及幾百個業主,要集合埋一齊先至可以完成發展。至於計劃入面嘅重頭戲高架單軌列車,仲要等到二○二三年至有望通車,即係等多兩屆政府都仲未得,你話係咪搞笑吖。

睇怕林鄭月娥想講嘅係,「起動九龍東」會面對唔少障礙,到時如果有乜阻滯無法如期落實,唔關港府事㗎。唉,未吹衝鋒號,先打退堂鼓,分明係幫自己搵下台階啫!

查實,港人都見怪不怪嘅喇,呢類大型基建項目,唔係胎死腹中,就係一拖再拖,咁多年來,試問有幾項工程可以按時啟動,如期完成㗎?好似煲呔曾吹完又吹嘅「十大基建」咁,絕大部分仲喺度紙上談兵呀。

就以千辛萬苦先至開咗工嘅啟德郵輪碼頭為例,一九九八年提出興建,一拖十幾年至落實,首個泊位最快都要後年中至啟用。仲有港珠澳大橋,上世紀八十年代已有人倡議興建,結果拖到近年至拍板,早前仲畀訟棍利用司法程序阻撓,又拖多大半年。

講番「起動九龍東」呢筆,煲呔曾早唔提,遲唔提,臨收工至「起動」,到時有功勞入自己數,有鑊就人哋孭,小學生都知佢諗縮數啦。計功夫茶話齋,講多無謂,食多會滯,橫掂九龍東計劃成事無期,隨時變成冇米粥,咁不如集中精力做一、兩件實事,唔使執政七年一事無成咁瘀吖。