假如閣下係狗主，咁啱你隻愛犬發癲狂咬，咬爛你屋企嗰張「中國製造」嘅廉價梳化，功夫茶奉勸一句，千祈唔好妄下判斷認為瘋狗症發作。即係咁，狗嘅嗅覺好靈敏，咬爛梳化或者唔係頑皮百厭，可能狗狗聞到無法容忍嘅特殊氣味。若然梳化被咬到溶溶爛爛，不妨趁機會睇睇裏面到底係乜乜東東芫荽葱，話唔定有驚人發現。
呢嗱嗱嗱，唔係嚇你，內地黑心傢俬已經殺入香港，無良奸商隨時害到大家周身痕！
有一位姓鄭嘅男士，冇耐之前屋企真係發生過狗咬梳化嘅破壞王行為。鄭先生正想嚴厲呵責愛犬之際，竟然發現梳化裏面充滿五顏六色嘅神秘物體。仔細再睇一睇，嘩！海綿又有，布碎又有，線頭又有，紙屑又有，最離譜嘅係大量存在疑似人類體毛，而且發出陣陣異味！
鄭先生舉報之後，本報記者委託理工大學生物及化學系副教授林漢華，化驗呢一張問題梳化。化驗結果證實，鬈曲狀毛髮的確來自人體，唔係腋毛就係陰毛。林漢華進一步發現，內藏藥棉以及紗布，懷疑不法商人利用醫療廢料製造梳化。專家得出一個結論：呢張梳化都頗為黑心！
一提到醫療廢料，功夫茶真係打冷震。你知啦，醫療物品好多化學物質，萬一梳化用家接觸到，周身痕都仲係小事，感染奇難雜症先至大件事。如果你幻想力再豐富少少，甚至會諗到藥棉以及紗布嘅「前度用家」可能係一位傷重不治嘅死者，而毛髮係佢嘅遺物，嗰一種陰森恐怖嘅感覺已經足以令你冷汗直猋！
咦咦咦，咪住先，香港唔係應該有監管嘅咩？內地氾濫成災嘅黑心食品都唔可以輕易流入啦，點解會容許黑心傢俬殺埋身？原來真相係防線出現漏洞，香港傢俬裝飾廠商總會秘書長嚴志明指出，現時政府只規管傢俬嘅防火安全以及承托力，至於品質就冇嚴格把關。換言之，香港官僚冇規定不能出售或者購買黑心傢俬，吹脹！
講真吖，如果功夫茶係海關人員，一定會千方百計好好防範黑心傢俬，點解？原因好簡單，中國製造嘅枱枱櫈櫈梳化床褥無處不在，海關人員暨其親朋戚友總有一件兩件喺屋企，萬一毒棉之類嘅物料害到闔府上下雞犬不寧，咁就大劑嘞。
所以咯喎，好心海關打醒十二分精神，千祈唔好瞌眼瞓，淨係規管防火安全係唔夠o架，更加要杜絕黑心傢俬。好話唔好聽，海關若然疏於防範而害到曾蔭權政府一眾高官沾染爛手爛腳皮膚病，咁就真係眼冤咯！