融合教育不融合，患有思覺失調嘅中四男生黃凌鋒懷疑與同學及老師相處出問題，上年喺學校墮樓身亡，死因庭尋日裁定死者死於自殺。呢個裁決可以講係意料中事，不過咁，學生校園自殺，點講都係悲劇。
點解會發生呢單校園悲劇嘅呢？校方同死者家屬各執一詞，外人難判是非，不過，大家不妨聽吓死因庭陪審團點講，或者可以搵到答案。陪審團建議港府審視現行融合教育制度，係咪適合涵蓋精神病患者，而且要增撥資源，為學校及學生提供適時支援，加強對學生嘅看管能力。
冇錯喇，歸根究柢，呢單校園悲劇嘅元兇，就係融合教育制度出咗問題！嗱，雖然陪審團冇畫公仔畫出腸，但盲嘅都睇得出，佢哋其實已經踢爆咗融合教育嘅兩大弊端。
第一，港府將有特殊教育需要嘅學生同一般學生撈埋一齊，安排草率，思慮不周，簡直係不負責任。第二，港府對響應融合教育嘅學校支援不足，將特殊學生踢畀主流學校就關人個關，唔止不負責任，直頭係靠害添吖。
本來呢，融合教育嘅概念未必唔好，鼓勵殘障及特殊學習困難學生入讀主流學校，增強自信，融入社群，幾好聽吖。好可惜，教育官僚眼高手低，做嘢冇心冇肺，虎頭蛇尾，佢哋搞教育，當交差嘅咋，美其名話融合教育，實際係縮骨卸膊，自己懶得費神。你話港產官僚咁樣搞教育，係咪缺德兼腦殘吖？
喂喂喂，細路仔都知啦，唔好話精神病學生，其他如自閉症同身體殘障嘅特殊學生，無論喺學習進度同行為模式方面，都同一般學生有別，雙方相處易生摩擦。加上當局一味卸責，對學校支援嚴重不足，唔使問都知遲早出事啦。我不殺伯仁，伯仁因我而死，中四生走上輕生之路，各位教育高官唔知有冇感到羞愧呢？
講開又講，香港教育制度出問題，莘莘學子慘成受害者，點止融合教育一瓣咁少。過去十幾年，港府高官好似患咗過度活躍症咁，將教育政策翻來覆去，朝令夕改，混亂不堪，搞到學校、老師、家長同學生疲於奔命，怨聲載道，依家融合教育嘅隱患暴露出嚟，只係一個警號嘅咋！
總而言之，融合教育不融合，教育官僚太腦殘。嗱，陪審團提出多項改善建議，希望港府高官冇閱讀障礙，可以睇得明啦。如果真係點極都唔明，咁就麻煩港府速速將呢班教育官僚送晒入特殊學校接受再教育！