如果一個政府弱雞，會出現乜嘢問題呢？答案顯而易見啦，萬事起頭難，餐餐都撞板，行正路都會有人出腳攔你一攔。《校本條例》就有辦你睇嘞，原本係一件冇乜理由反對嘅事，卒之搞來搞去搞到一鑊泡。前前後後拖咗十幾二十年，家陣先至叫做正式開綠燈咋。
尋日喎，終審法院裁定《校本條例》冇違反《基本法》保障宗教自由，五位法官一致裁定提出司法覆核嘅天主教香港教區敗訴。
《校本條例》到底係乜東東？簡單咁講，九十年代已經醞釀改善學校管理，立法會喺二○○四年通過條例，規定全港資助中學及小學必須成立向政府註冊嘅法團校董會，加入由選舉產生嘅家長、教師同校友代表。亦即係話，校董會民主化，組成部分更加多元化。
嗱嗱嗱，你話嘞，民主化有乜唔好呢？冇資格選特首嘅小市民恨都恨唔到啦。之但係咁，從來唔會一人一票選領袖嘅天主教香港教區認為，《校本條例》將辦學團體嘅校董會人數比例減至六成，權力有被架空嘅危險，所以非常不滿，一於對簿公堂。你知啦，打官司曠日持久，輸咗唔服又要上訴，司法遊戲過三關好嘥時間㗎。
好彩終審法院終於一錘定音，裁定《基本法》只係保障宗教團體可以喺學校進行宗教教育、早禱會等等，並不保證控制權及管理權，而由於宗教團體可以委任大多數校董會成員，《校本條例》冇直接影響校內宗教活動。
所以話啫，弱雞政府百事哀，明明係合情合理又合憲嘅事，竟然會受到百般阻撓，而且隨時任人成功「挑機」。好似港珠澳大橋事件咁吖，有個婆婆提出司法覆核，哈，打贏官司喎，一嘢攔住工程冇得開工。又係大話夾好彩，上訴庭裁定港府勝訴，咁先至消除障礙咋，不過代價係成本增加六十五億。
即係咁，姣婆遇着脂粉客就話一拍即合啫，弱雞遇着老頑童，後果往往係一拍兩散。
講番《校本條例》吖，法官就講得啱嘞，教區同教育局應該以學生為重，彼此放下爭議，做好教育工作。計功夫茶話齋，係就係遲咗好耐先至開工，不過改善學校管理始終係遲到好過冇到。
嗱，冇得再拗㗎喇，冇得再拖㗎喇。唔該教育局同學校好好商量，盡快依照《校本條例》成立民主化嘅校董會，為莘莘學子謀取最大福利。
至於弱雞政府，有冇辦法改善「官本管理」？未有民主化一人一票選特首之前，惟有向天主祈禱，祝願下任特首唔好再係咁樣衰，哈利路亞！