咦咦咦，莫非孤寒財主轉死性？長者醫療券金額不但將會加碼，七十歲或以上公公婆婆原本每人每年二百五十元，明年一月一日開始加到五百元，而且適用範圍仲會擴大，長者可以使用醫療券驗眼。
聽落好似幾有孝義，之不過諗深一層，特區政府身為富貴財主其實仍然相當孤寒，因為尚未滿足到公公婆婆嘅訴求。不如咁啦，先同大家睇睇早前嘅兩個民意調查。
第一個民意調查係咁嘅，民建聯訪問過老人家之後得出結論，四成二長者冇用過醫療券，原因包括幫襯政府診所毋須使用，或者完全唔識得點樣用，又或者相熟醫生根本冇參與醫療券計劃。民建聯就話嘞，政府有必要檢討醫療券計劃，例如改善複雜及繁瑣嘅登記手續，並且增加金額至一千元，降低合資格年齡至六十五歲。
至於第二個民意調查，工聯會發現八成長者認為政府支援不足，每月提供嘅一千零三十五元高齡津貼生果金並不足夠。好似醫療券咁吖，即使加到五百元都係到喉唔到肺，工聯會建議增至一千元，長者先至可以應付實際需要。
大家明未？老人家期望一千，財主佬還價五百，唔係孤寒又係乜呢？講真吖，即使一年醒你一千元睇醫生，都唔算好慷慨㗎咋，事關今時今日剝隻牙都講緊一千幾百，醫療券只係好過冇咁解。
長者醫療券擴大到可以驗眼又點睇呢？咁講啦，都只係聊勝於無，因為衞生署淨係容許公公婆婆幫襯第一部分註冊視光師，人數僅佔所有視光師三成八。原來喎，視光師註冊分四部分，第一部分係持有視光學理學士學位，可以屈光檢查以及眼疾診斷，第二至第四部分多數屬於學徒制出身嘅視光師，考獲不同證書之後可以屈光檢查，不過唔可以斷症。
好嘞，假如你一直幫襯非第一部分註冊視光師，又唔想轉換新環境咁麻煩，長者醫療券擴大適用範圍係冇意義㗎。
計功夫茶話齋，政府對於最關鍵嘅問題始終冇解決，呢一個問題就係徹底改善公共醫療系統。試想想，如果公公婆婆可以輕輕鬆鬆去公立醫院求診，而唔係排期排到一年半載之後，冇醫療券都冇所謂啦。弊就弊在家陣嘅公共醫療系統千瘡百孔，醫護人手長期不足，婦產科更加係逼爆玻璃，咁先至要推出長者醫療券，企圖將老人家送去私家診所。
即係咁，財主佬仍然孤寒，老人家照顧不足。若然曾蔭權唔想背負不孝罪名，最後一份施政報告必須顯示敬老誠意，否則公公婆婆又走去禮賓府打小人就尷尬死啦！